Kalaallit Nunaanni danskisut innuttaassusillit ikilisimapput
Kalaallit Nunaanni innuttaasut 2023-mi 90-inik amerleriarsimasut danskisut innuttaassusillit ikilisimapput.
Innuttaasut amerlassusaat pillugit kisitsisit nutaat takutippaat nunamut maanga nunasisut pissutigalugit innuttaasut amerlassusaat allanngorartuunngilaq.
Naatsorsueqqissaartarfik naapertorlugu januaarip aallaqqaataani inuit 56.699-it Kalaallit Nunaanni najugaqarput.
- Ukiup ataatsip ingerlanerani innuttaasut 90-inik amerlisimallutik, Danmarkimili innuttaassuseqartut Kalaallit Nunaanni najugaqartut 290-inik ikilisimapput, Naatsorsueqqissaartarfik allappoq.
Soorlu ataani takuneqarsinnaasoq, 2024-mi nunasisorpassuit Asiameersuupput Europallu sinneranit nunasisuullutik.
Kina kalaaliunersoq pisortatigoortumik nassuiarneqarnikuunngilaq, Naatsorsueqqissaartarfiulli innuttaasut taakkualu angajoqqaavisa sumi inunngorsimanerat ima naatsorsorpai:
60-it sinnerlugit ukiullit amerliartorput — inuilli inunngortut ikiliartorput
Innuttaasut amerliartuinnaraluartut 60-it sinnerlugit ukiullit amerliartornerat malunnarpoq. 2023-mi 9.402-niit 9.741-nut 339-nik amerleriarput.
Ukiorpassuarni siulittuutigineqartarsimavoq utoqqaat amerliartuinnavissasut — tassa inuiaat katitigaanerat allanngoriartuinnassasoq.
Naatsorsueqqissaartarfiup nalunaarutigaa sorsunnersuup aappaaniilli aatsaat taama inunngortoqanngitsigisoq:
- Inunngorsimasut naatsorsorneranni takuneqarsinnaavoq 2023-mi inuusimasut 716-iinnaasimasut. Sorsunnersuup aappaata kingorna inunngortut aatsaat taamak ikitsigipput, arnat 20-30-nik ukiullit illoqarfiit anginerusut avataani najugaqartut 2022-misut 2023-mi siullermeerlutik meerartaarnissartik kinguartissimagaat takuneqarsinnaavoq.
Innuttaasut 35 procentii Nuummi najugaqarput
Kommunit qiviaraanni Qeqqata Kommuniani Kommuneqarfik Sermersuumilu innuttaasut amerlisimapput, kommuninili allani ikilisimallutik.
Naatsorsueqqissaartarfik naapertorlugu Nuummi innuttaasut amerliartupiloorsimapput, tassami 268-inik amerlisimapput.
Maanna innuttaasut 35 procentii Nuummi najugaqarput.
Najugaqarfiit ineriartorneri ataani takuneqarsinnaapput, tassalu illoqarfiit pingaarnersaanni innuttaasut ukiut qulit kingulliit ingerlaneranni 3.000-inik amerlisimapput.
