Kalaallit Nunaanni kaattunut ikiuigasuarneq
Kalaallit Nunaanni meeqqat kaattuut Folketingip nunarput pillugu ataatsimiitsitaliaani oqallisigineqarput, taamalu ajornartorsiutit aaqqinniarlugit suleqatigiittoqarnissaa amerlanerussuteqarluarnit isumaqatigiissutigineqarluni.
Unicef, peqatigiiffik Kalaallit Meerartaat aamma Danmarkimi nunatsinnilu isumaginninnermut naalakkersuisoqarfiit qaammatialunnguit ingerlaneranni kalaallinut kaattunut amerlaqisunut siunnersuinissamut ilitsersuinissamullu piareersimassapput.
Tamanna Siumup Folketingimut ilaasortaatitaata Lars-Emil Johansenip siunnersuutaata tunngavigaa. Ullumilu folketingip nunarput pillugu ataatsimiitsitaliaani sivisuumik ataatsimiittoqarpoq, siunnersuullu amerlanerussuteqarluartunit tapersersorneqarpoq.
- Nalunaarusiat naammareerput, maanna illuatungeriit tamarmik suleqatigiinnissamik pisussaaffilerneqassapput, Lars-Emil Johansen oqarpoq.
Partiit sisamaasut kalaallit meerartaasa atugarisaannik piffissap sivikitsup ingerlanerani pitsannguutaasussamik upernaap ingerlanerani tigussaasunik arlariinnik siunnersuusiussapput.
Isumassarsiaq ataatsimiitsitaliamit ilassilluarneqarpoq.
- Ajornartorsiutit aaqqinniarlugit ataatsimoorluta akisussaaqatigiippugut, taamak Socialemokraterne-t kalaallit nunaannut tunngatillugu oqaaseqartartuat Mogens Jensen oqarpoq.
Aammami iliuusissatut siunnersuuteqartoqarnissaanut piffissanngorami. Tassami danskit politikerii arlallit Kalaallit Nunaannut tunngatillugu naammagittarunnaarput. Kalaallit Nunaata FN-ip meeqqat piginnaatitaaffii pillugit unioqqutitsineranik Unicefip nalunaarnera utsersortoornermut aallarniutaavoq.
- Pineqartoq manna mianersoqqussutaaginnanngilaq, oqaatigilluaannarlugu naammagittarnerput tamaanga killeqarpoq, Per Ørum Jørgensen oqarpoq.
Mogens Jenseip Per Ørum Jørgensenillu ilanngullugu oqaatigaat, taamatu nalunaarnerup kalaallit nunaanni naalakkersuisunut pilersaarummut akuerseqqullugit tamakkiisumik piumasaqaataasoq.