Ny valuta
Kalaallit Nunaannit Bankit bitcoiniuteqanngitsut
Grønlandsbanken aamma BankNordik bitcoininut nuussissanngillat aamma akunnermiliuttutut tuniniaasussanngillat, bitcoinimmi aningaasaqarnermut suliffeqarfinnit qularnaveeqqusingaanngillat, pinerlunnikkullu aningaasarsiat bitcoininut nuunneqarsinnaanerat annertuumik aarleqqutigineqarmat
Kalaallit bitcoininut aningaasaliillutik pisisartut amerliartuinnaraluartut, tamanna bankit allatullu qitiusumit aqqutsiviit avataatigut ingerlanneqarpoq. Kisianni facebookimi quppernernit bitcoininut puljeat aningaasaliiffigineqarsinnaasutut sivikitsuinnaallu iluani iluanaaruteqarsinnaasut akileraaruteqanngitsumik ussassaarutigineqartarput.
Aamma atuaruk: Kalaallit Nunaanni bitcoinimik inuussutissarsiuteqartoq siulleq
Innersuutigineqanngitsoq
Kalaallit Nunaannili bankit atuisartuminnut bitcoin innersuukkusunngilaat, illuanik mianersoqqussuteqarput aningaasaliissutit tamakkerlugit annaaneqarsinnaammata.
-Ineriartorneq soorunami alaatsinaapparput, kisianni bitcoinit pillugit siunnersuisanngilagut, tunngaviusumimmi aningaasannanniutaapput aningaasaliissutigineqartullu tamakkerlugit annaanissaannut annertusisamik aarlerinartortallit, Grønlandsbankenip pisortaa Martin Kviesgaard mailikkut akissuteqarluni allappoq.
Atorneqanngitsut
BankNordikimilu bitcoinit bankimi sullissineranni atorneqanngillat.
– Bitcoinit qitiusumik oqartussaasunut attuumassuteqanngimmata, soorlu Danmarkip Nationalbankianut, U.S Federal Reservemut imaluunniit Franskit naalagaaffiata aningaaserivianut, taava aningaasaq taanna nuussinermi imaluunniit tuniniaanermi atungarinngilarput. Aningaasaqarnermut pappiaqqat, aningaasat imaluunniit “option”-itut tunisassiavut sullissinermilu tunniuttakkagut aningaasaqarnikkut suliffeqarfinnit akuerisanit qularnaveeqquserneqartarput, soorlu bankinit qulaani taaneqareersunit, BankNordikimi inuussutissarsiornermut pisortaq Thomas Tyt Morgensen allappoq.
Aningaasariviit pisortaasa bitcoinimut qanoq oqaaseqarnerat Sermitsiaq aviisimi atuaruk: Aviisi digitaliusoq uani pisiarisinnaavat: