Kalaallit Nunaat kvotinik neriorsorneqanngilaq
Klimaministerip aamma Naalakkersuisut Siulittaasuata ataatsimeeqatigiinneranni Kalaallit Nunaat CO2-kvotinik pisissutissallugu neqeroorfigineqanngilaq.
Neriuutigisimaguniuk danskit CO2-kvotinut pisissutissanik aningaasanik neqerooruteqarsinnaanerat, taava Naalakkersuisut Siulittaasuat Kuupik Kleist, IA, neriulussinnarsimassaaq siullermeerluni klimamut aamma nukissiuutinut ministeri Connie Hedegaard, Konservativineersoq ataatsimeeqatigigamiuk.
Kalaallit Nunaata koruunit millionit arlallit annertunerusumik CO2-mik aniatitsinermut kvotinik pisinissaminut atorusuppallaanngilai. Kisianni CO2-mut kvotit pillugu Danmarkimik oqaloqateqarnissaq uaninnguamiinngilaq.
– Uagut kvotinik pisinissarput ornigivallaanngilarput. Ajornartorsiut tamanna aamma kingusinnerusukkut oqallisigisussaavarput. Sulimi tamanna tikinngilarput, Nalakkersuisut Siulitaasuat Kuupik Kleist sermitsiaq.gl-imut oqarpoq.
– Tassa imaannerluni Danmarkimiit kvotenik pisinissamik tigussaasumik neriorsusoqarsimanngitsoq?
– Naamik, taamaattoqanngilaq, Kuupik Kleist naqissusiisoq.
Tulliani aggustip naalernerani ataatsimiinnissamut Kalaallit Nunaani aamma Danmarkimi atorfillit apeqqutit suli qulaajarneqanngitsut, Kalaallit Nunaata suliffissuaqarnikkut aamma aningaasaqarnikkut ineriartornissaminut kissaatigisaasa silaannaap allangoriartorneranut isumaqatigiissummut nutaamut tunngatillugu, takussutissaqartilerniarlugit misilikkaluassavaat. Assersuutigalugu tamatumunnga tunngatillugu suliniutit Kalaallit Nunaanni ingerlanniarneqartut, CO2-mik kinguneqartitsinissaat naatsorsorneqassapput, Naalakkersuisut Siulittaasuat ilisimatitsivoq.
– Uagut suniarnerput aamma kissaatigisagut ataatsimoorlutalu angusassavut suussanersut tigussaaneruleraluttuinnarput, Kuupik Kleist oqarpoq.