Kalaallit Nunaat pas-ini innuttaassutsitut allassimalersinnaavoq
Siunissami kalaallit pas-iini kalaallisut inuiaassuseq allanneqarsinnaanersoq inatsisinik atortitsinermut ministerip Peter Hummelgaardip misissortikkusuppaa.
Ullumikkut kalaallinut passimik tunniussisarneq, ilaatigut inuiaassutsimut tunngatillugu, passimut inatsimmi immikkut malittarisassaqanngilaq. Tamannali immaqa allanngortinneqassaaq.
- Kalaallit kinaassutsimik misigisimanerat kalaallinut qanoq pingaaruteqartigineranut paasinnilluarnera erseqqissassallugu uannut pingaaruteqarpoq. Taamaattumik kalaallit pas-iini inuiaassutsip kalaallisut allassimasinnaanera misissoqqullugu Inatsisinik atortitsinermut ministereqarfik qinnuigaara, inatsisinik atortitsinermut ministeri Peter Hummelgaard, IA sinnerlugu folketingimi ilaasortamut Aaja Chemnitzimut akissummini, ilisimatitsivoq.
Aasaanerani sulinngiffeqarneq sioqqullugu paasinarsissasoq
Aasaanerani sulinngiffeqannginnermi apeqqut tamanna paasinarsissasoq ministerip naatsorsuutigaa.
Sumi inunngorsimaneq pillugu paasissutissat pillugit Naalagaaffiup politiivi ilisimatitsipput, qallunaat kalaallillu pas-iini sumi inunngorsimaneq pillugu paasissutissat Det Centrale Personregister-imit (CPR) pissarsiarineqartartut.
Naalagaaffiup politiivi ima nassuiaapput:
- Qallunaat pas-iini sumi inunngorfik tassaavoq kommuni, pas-imik piginnittup inunngorfiata palaseqarfia allaqqasarluni, ilisimatitsissutaavoq.
Inunngorfik
- Kalaallinut pas-inik tunniussinermut atatillugu palaseqarfik pas-imi inunngorfittut allassimasarpoq, taanna CPR-imi nalunaarsorneqarsimappat. Palaseqarfik tassaavoq Kalaallit Nunaanni palasip atorfeqarfia, amerlanertigullu ilageeqarfiit arlallit atorfeqarfigisarpai, taakkunannga ataaseq ilageeqarfittut pingaarnertut taaneqartarluni. Assersuutigalugu inunngorfik CPR-imi allassimappat “Palaseqar Upernavik” imaluunniit “Palaseqar Sisimut”, PAC-ip paasissutissiaraa oqaaseq “Palaseqar” (palaseqarfik) pas-imi inunngorfiup ataani allassimasumit peerneqartartoq, taamaalilluni palaseqarfiup aqqa pas-imi allassimalertarpoq ("Upernavik" imaluunniit "Sisimiut"), ministerip akissutaani naalagaaffiup politiivinit nassuiarneqarpoq.