Kalaallit Nunaat pillugu aalajangiiffigineqartussat tamarmik Kalaallit Nunaanni aalajangiiffigineqartassapput

- Kalaallit Nunaat pillugu aalajangiiffigineqartussat tamarmik Kalaallit Nunaanni aalajangiiffigineqartassapput.

Statsministeri Helle Thorning-Schmidt, Socialdemokraterne, Kalaallit Nunaata aningaasaqarnera pillugu oqallinnermi Naalakkersuisunut taamatut inassuteqarpoq, tassani Nunatta aningaasaqarnerata iliuuseqarfigineqarnissaa Naalakkersuisunit iliuuseqarfigineqartariaqartoq oqaatigalugu.

Statsministeri kiisalu danskit aningaasaqarnermut ministeriat Bjarne Corydon Folketingimi partiinit Dansk Folkepartimit, Venstremit, Liberal Alliancemit kiisalu Konservativenit oqallipput.

Kalaallit Nunaata aningaasaqarnera 'ilungersunartoq' danskit naalakkersuisuinit qanoq iliuuseqarfiginiarneqarnersoq Dansk Folkepartimit Søren Espersen apeqquteqarpoq.

Aaqqissuusseqqinnernut suleqataaneq
- Kalaallit Nunaata aningaasaqarnermut siunnersuisooqatigiivisa inerniliaat maluniarparput. Kalaallit Nunaat namminersulermat 2009-mili suli aaqqissuusseqqittoqarsimanngitsoq maluginiarneqarpoq, statsministeri oqaluttarfimmit oqarpoq. Helle Thorning-Schmidt Naalakkersuisut siulittaasuat Kim Kielsen Nunatta aningaasaqarnera pillugu januaarimi ataatsimeeqateqarpoq.

- Aaqqissuusseqqinnerit ingerlanneqarnissaat siunnersuisooqatigiinnit siunnersuutigineqartoq pillugu Naalakkersuisut siulittaasuat oqaluuppara. Aaqqissuusseqqinnikkut atugarissaarnermut siunissamut iluaqutaassaaq, Helle Thorning-Schmidt oqarpoq.

- Pisortat suliffeqarfiini aningaasartuutit isertitallu ataqatigiitinneqarnissaat suliaq annertuvoq. Siunissami ajornartorsiut annertunerulissaaq, utoqqalisartummi amerlanerulertussaapput. Naalakkersuisunngoqqammersut tamanna sulissutigisariaqarpaat, Helle Thorning-Schmidt oqarpoq. Aaqqissuusseqqinnernut Danmarkip suleqataasinnaanera aamma oqaatigaa.

Inuussutissarsiortunut aningaasat amerlanerusut
Danskit naalakkersuisui aamma Nunatta naalakkersuisui ataatsimut Kalaallit Nunaanni inuussutissarsiorneq pillugu ataatsimut nalunaarusiaq pingasunngormat saqqummiuppaat. Tassani aatsitassarsiorneq takornarialerinerlu qitiutillugit nalunaarusiaq suliarineqarpoq. Finansministerip Bjarne Corydonip, Socialdemokraterne, oqaatigaa Kalaallit Nunaat aatsitassarsiornermut aningaasanik atukkiinissaq ammaffigineqartoq.

- Nalunaarusiami aamma atuarneqarsinnaavoq danskit kalaallillu inuussutissarsiornikkut annertunerusumik suleqatigiilernissaat anguniarneqassasoq, aningaasaqarnermut ministeri oqaluttarfimmit oqarpoq.

- Aatsitassarsiornermi aningaasaliinissanut periarfissaasut amerlineqarnissaat kiisalu Issittumi aningaasanik atukkiisarfimmik Den Nordiske Investeringsbank-imik taaneqartumik pilersitsisoqarnissaa anguniarneqarpoq. Taanna Den Europæiske Investeringsbankimut qinnutigineqassaaq pilersinnissaanut.

- Aatsitassarsiorfiit pitsaasut Eksport Kredit Fondenimit ikiuisoqarnissaa nalunaarusiami aamma atuarneqarsinnaavoq. Taamaasilluni aningaasaliisut qanoq annertutigisumik aningaasaliisimanerat ilaatigut ersarinnerusumik takuneqarsinnaalissaaq, Bjarne Corydon oqarpoq.

Takornarialerinermi suleqatigiinneq
Kalaallit danskillu takornarialerinermi annertunerusumik suleqatigiinnissaat pitsanngorsarneqarsinnaavoq. Visit Greenlandip Visit Danmarkillu suleqatigiinnerulernissaat ilisimatuunit siunnersuutigineqarpoq, Bjarne Corydon ilisimatitsivoq.

Naalakkersuisut danskinit ikiorneqarnissamik pisariaqartitsissappata allaffissornikkut ikiuisinnaasunik neqerooruteqalernissaa inatsisissatut siunnersuummik taasisoqarpoq - ilaatigut Siumumit taaseqataaffigineqartumik.

Inuit Ataqatigiit, SF aamma Enhedslisten 'danskit ilanngunnerat' akerleraat.

- Folketingimi oqallinneq eqqumiippoq. Namminersorlutik Oqartussat aningaasaqarneq nammineq ingerlataraat, partiit pingasut oqarput.

Assit ataani takukkit