Kalaallit Nunaata Kinami sinniisoqarfia pisortatigoortumik ammarneqarpoq
Kalaallit Nunaata Kinami Sinniisoqarfia 2021-mili ammaraluartoq, coronap tunillaassuunnera pissutigalugu sinniisoqarfimmik pisortatigoortumik ammaaneq aatsaat pisinnaavoq. Taamaammat angalaqatigiit amerlasuut peqataaniarlutik Kalaallit Nunaannit Kinamut angalapput.
Ullumikkut ulloq Kalaallit Nunaannut Kalaallit Nunaata Beijingimi Sinniisoqarfiata ammarneqarneratigut malunnaatilik nalliuttorsiutigineqarpoq. Naalagaaffinngornissamut Nunanullu allanut Naalakkersuisoq Vivian Motzfeldt, Naalakkersuisut sinnerlugit Kalaallit Nunaata Sinniisoqarfia pisortatigoortumik ammarpaa.
Pisup oqaluttuarisaanermut pingaarutillip peqatigisaanik pisortatigoortumik Kinap Kalaallit Nunaatalu akornanni sinniisoqarnikkut attaveqarnerup pilersinneqarneranik malunnartitsiffiuvoq.
Ammaanersiorluni nalliuttorsiornermi nuimasut arlallit peqataapput, tassani aallartitaqarfinnit aallartitat, Kinamiut naalakkersuisuisa sinniisaat kalaallillu aalisarnermik inuussutissarsiortut najuupput. Naalakkersuisoq ammaanermi oqalugiarnermini Kinap aamma Kalaallit Nunaata akornanni sinniisoqarnikkut attaveqarnerat nukittooq erseqqissarpaa, aamma politikikkut, aningaasaqarnikkut kulturikkullu Kinamik attaveqarnini nukittorsassallugu kissaateqarneq.
Niuernikkut attaveqarneq qulakkiissagaa
Motzfeldtip aalisakkat aalisakkanillu tunisassiat nunanut allanut tunisatta 90 procenterigaat oqaatigaa.
- Tamanna aningaasaqarnitsinnut naleqartorujussuuvoq, silalli pissusaata allanngoriartornerani aamma qajannarsisitsivoq. Tamannalu Kinami aalajangersimasumik sinniisoqarfeqalernissamik Naalakkersuisut patsisaasa pingaarnerit ilagaat, niuernikkut atassuteqarnerput attakkumavarput annertusarumallugulu, peqatigisaanillu Kinami niuerfimmut isersinnaalluarnerunissarput sulissutigiumavarput, tassanilu pisortatigoortumik aallartitaqarnikkut attaveqarneq iluaqutaasinnaavoq, taanna oqarpoq.
Naalakkersuisup ammaanermi pisortatigoortumik oqalugiarnerata saniatigut Kalaallit Nunaata Bejingimi Sinniisoqarfiani pisortaq Jakob Isbosethsen, Danmarkip Kinamut aallartitaa Thomas Østrup Møller kiisalu *vice-præsident for Chinese People’s Institute for Foreign Affairs oqalugiarput.
Aaqqissuussanut assigiinngitsunut ornigutissasut
Kalaallit Sinniisoqarfiat Savalimmiut Sinniisoqarfiat peqatigalugu qallunaat aallartitaqarfianni inissisimavoq, ammaanissamullu sulineq november 2021-mi allartinneqarpoq. Coronap tunillaassuunnera pissutigalugu sinniisoqarfimmik pisortatigoortumik ammaaneq siusinnerusukkut pisinnaasimanngilaq.
Ullumi siusinnersukkut Naalakkersuisup Kinami Niuernermik Naalakkersuisup tullersortaa Ling Ji naapippaa, naapinnermilu politikikkut attaveqarneq oqallisigineqarpoq, tassani sinniisoqarfimmik ammaaneq Naalakkersuisullu Kinami niuerfimmut annertunerusunik periarfissaqarnissamik kissaataat ilanngullugu.
Ulluni aggersuni Naalakkersuisup Qingdao-imi China Seafood EXPO takuniassavaa, tassungalu Royal Greenlandip Polar Seafoodillu sinniisai takuniaaqatigissavai.