Kalaallit Nunaata kujataani mittarfiit aalassassutaaqqipput
nunap immikkoortortaani angallanneq pillugu politikerit ataatsimoortumik isumaqatigiissutaat iluamilluuniit atuutilinngitsoq mittarfimmik allilerinissaq nutaamik toqqissisimajunnaartitsivoq.
Angallanneq pillugu ataatsimeersuarnermi qanittukkut ingerlanneqartumi peqataasut isumaqatigiissutigaat narsarsuup mittarfiata atlantikoq qulaallugu timmisartuussisarnermi ukiuni tulliuttuni qulini assortuussutaanissaa pinngitsoortinniarneqassasoq. Kalaallit Nunaata kujataani politikerit ataatsimeersuarnermi peqataasut peqatigitillugu neriorsuutigaat, ukiut tulliuttussat angallannikkut aaqqissutissat Kalaallit Nunaannut tamarmut inuiaqatigiinnullu aningaasarsiornikkut pitsaanerpaasussat anguniarlugit misissuinernut atorneqassasut.
Taamaakkaluartoq Narsami namminersortumik inuussutissarsiortut ilaat isumaqarput, Qaqortumi borgmesteri Simon Simonsen angallanneq pillugu ataatsimeersuarnermi aalajangiussanut avaqqutaarilersoq. Borgmesteri ataatsimeersuarnerup kingorna oqarpoq, Qaqortup eqqaani mittarfittaarnissaq Qaqortup sulissutigilerniaraa.
Narsami namminersortumik inuussutissarsiortut politikerit akisussaasut qinnuigaat, Kalaallit Nunaannut tamarmut inuiaqatigiinnullu aningaasarsiornermut aaqqissuutissamik misissuiniarnerit aalajangiusimallugillu aallartittariaqaraat.
»Borgmesterip nipituuliuinnarluni nunap immikkoortortaani mittarfiliorniarnermik iluatsitsiniarnera naammaginnaranilu pimoorussinerunngilaq,«inuussutissarsiortut erseqqissaapput.
Taakku isumaqarput, kalaallit nunaata kujataani aaqqissuussaanikkut misissuinerit maanna ingerlanneqareersut ajornanngitsumik aallaavigineqarsinnaasut, taakkumi takutippaat, Narsarsuarmi mittarfiup pigiinnarneqarnissaa kalaallinut inuiaqatigiinnut pitsaanerpaallunilu akikinnerpaajussasoq.
»Inerniliissutit suli atuunnersut nalilersornissaat pissusissamisoornerussagaluarpoq, tassungalu atatillugu periarfissat allat misissuiffigineqarsinnaapput. Aaqqissutissaq qanorluunniit ittoq toqqarneqassagaluarpat arlaannik pakatsisitinngitsoortussaanngilaq, kisianni aaqqiissutissaq pitsaanerpaaq ujartorlugu suleqatigiikkallarta - kiisami,« narsami namminersortumik inuussutissarsiortuniit oqaaseqaataanni allassimavoq.