Kalaallit Nunaata meeqqaminik ikiuinissaa K-p pinngitsaaliissutiginiarpaa

Konservativet Nunatsinnut - aamma Venstremut sakkortusaarnialerput, jp-mi taamatut allaaserisaqarput.

Kalaallit Nunaanni meeqqat arfiniliugaangata ataaseq naammattunik nerisaqarneq ajorneranik nalunaarusiaq ilaatigut ersersitsivoq kaallunilu atuariartortariaqartarluni imaluunniit innartariaqartartoq. Taamaakkaluartoq namminersornerusut Danmarkip ikiuiniarnera itigartippaat.

Venstrep aalajangiusimavaa Danmarkip akuliutinnginnissaa, kisianni Konservativet tamanna naammagiunnaavippaat. Kalaallit Nunaannut tunngasunik oqaaseqartartup Per Ørum Jørgensenip (K) erseqqissarpaa Danmark meeqqat pillugit nunat tamalaat isumaqatigiissutaannik atsiorsimanera taamaattumillu tamatuma unioqqutinneranut Danmark akisussaasuusoq.

- Akuerineqarsinnaanngilluinnarpoq meeqqat kalaallit arfiniliugaangata ataaseq kaalluni innartarnera. Tamanna danskinut innuttaasunut atuutsissinnaanngilarput, Kalaallit Nunaata Danmarkillu akornanni ileqquusumik tamatumunnga tunngasunik isumaqatigiissutit atuukkaluarpataluunniit.

Isumaqatigiissutit unioqqutinneqartut malittariaqarpagut (FN-ip meeqqat pillugit isumaqatigiissutaa, aaqq.), Per Ørum Jørgensen oqarpoq.

Taassuma erseqqissarpaa isumaqatigiissut taanna naapertorlugu nuna avataaniit ikiorneqarnissaminut neqeroorfigineqartoq pinngitsoorani akuersaartussaasoq, nammineq ajornartorsiutit qaangersinnaanngippagit.

Kalaallit Nunaata ikiuiniarneq nammineq akueriumanngippagu, taava ukiumut bloktilskudip 3 mia. koruuniusut ilaasa 35 millioner koruunit meeqqat tamarmik ullormut marloriarlutik atuarfimmi nerisinneqartarnissaannut immikkoortitsinissamut piareersimanerarpoq. Velfærdsministeriet Statsministerieqarfimmut innersuussivoq, tassunga Kalaallit Nunaat atammat.

Sapaatit akunnerannut ataasiarluni marlunngornikkut statsiministerip Anders Fogh Rasmussenip (V) tusagassiortunik ataatsimiisitsinermini isumaqatigiissummik atsiugaqarneq naalagaaffeqatigiit akisussaaffigigaat unnerpaa. Illuatungaatigulli akuliunnianngilaq, kalaallit politikerit isumaginninneq ingerlatarimmassuk.

- Kalaallit Nunaat Danmarkisulli nunat tamalaat isumaqatigiissutaasa malitsiannik aalajangersakkanut ilaapput. Taamaattumillu uagut soqutigisariaqarparput, kisianni imaaliallaannaq oqarfigisinnaanngilagut imaattariaqarpoq, pissutigalugu Kalaallit Nunaannut akisussaaffik tunniukkatsigu, taamaattumik kalaallit naalakkersuisut pisussaapput kalaallit meeqqat ajunngitsumik atugaqartinnissaannut, taamaattariaqarpormi, Fogh oqarpoq.