Fortjenstmedaljer
Kalerrisaarutit aallartikkaangata aggertarput
Sisimiuni kommunimi ataatsimiittarfimmi qatserisartut pingasut ukiuni qulini aamma 25-ni qatserisartuusimanerminni nersornaaserneqarput
Siggartaatit kalerissaarutit aallartikkaangata ukiut ingerlanerini annaassiniaajartortuarsimapput.
- Qatserisartuuneq suliffiinnaanngilaq inuusaasiullunili. Kikkut tamarmik illumik ikuallattumik qimaagaangata qimaaffiatigut iserlutik qatseriartortarput, upalungaarsimanermut pisortaq, Ole Kreutzmann, ilaatigut tusagassiuutinut nalunaarummi taama oqarpoq.
Uku februaarip pingajuanni nersornaaserneqarput:
- Upalungaarsimanermut mesteri Karl Peter Lerch 1992-mi februaarip aallaqqaataani qatserisartunngorpoq, ukiunilu 25-ni qatserisartuusimanerani Dronning Margrethe aappaata nersornaasiuttagaanik nersornaaserneqarpoq. Karl Peter Lerch 1991-imi qatserisartunngoqqaarpoq, pappialatigulli allattorsimanani ingerlaqqaarsimalluni.
- Upalungaarsimanermut ikiorti Abel Olsen 2003-mi januaarip aallaqqaataani Akunnaami qatserisartunngoqqaarpoq. Uninngalaariarluni Sisimiuni qatserisartuunini nangippaa taamaasillunilu maanna ukiuni qulinngortorsiorluni.
- Upalungaarsimanermut ikiorti Seth Lyberth qatserisartutut sulinini aallartippaa februaarip aallaqqaataani 2007, maannalu ukiuni qulinngortorsiorluni. Seth Lyberth taaneqartut siulliit marluk assigalugit ukiut ingerlanerini annaassiniarnermi ikuallattumilu suliaqarnermi ilinniagaqartarsimavoq
Ilaqutaasut borgmesterip qujaffigai
Borgmester Hermann Berthelsen aamma ukiorpassuarni qatserisartuusimasunut qujaniarpoq, puigoqqunngilaali aamma aappaasut ilaqutaasullu qatserisartunut
tunuliaqutaasartut angerlarsimaffimmillu ingerlatsisuusartut qatserisartutut suliartoraangata.
Qeqqata Kommuniani Sisimiuni qatserisartut tanngassimaarutigalugu paasissutissiissutigaat qatserisartut 17-it nersornaaserneqarsimalersut. 13-it ukiut qulinngortorsiornerminnut, ataaseq ukiut 20-inngortorsiornerminut pingasullu ukiuni 25-ni qatserisartuusimanerminnut.