Kalistat Dubaimut ingerlaarpoq: Parisimi isumaqatigiissummut nunarput ilannguteriaannaavoq
Massakkorpiaq nunat assigiinngitsut 150-it sinnerlugit amerlassusillit sinniisaat, naalakkersuisut, inatsisartut, silap pissusaanik ilisimatuut, NGO´t allallu soqutigisallit Dubaimi katersuupput. Sermitsiaq.AG-p ilisimatinneqarnera naapertorlugu Nunalerinermut, Imminut Pilersornermut, Nukissiutinut Avatangiisinullu Naalakkersuisoq, Kalistat Lund (IA) ataatsimiittunut peqataajartorluni ingerlaarpoq.
Marlunngorneq 14. november Inatsisartut aalaangiipput Parisimi isumaqatigiissummut nunatta ilanngutsinneqarnissaanik sulissutiginninnissamut Naalakkersuisut pisinnaatissallugit.
Tamatuma malitsigisaanik Naalakkersuisut nalunaaruteqarnikuupput, maanna FN-ip silap pissusaa pillugu isumaqatigiissummik sullissivissuanut (UNFCCC) nalunaarutigineqariaannanngortoq, Kalaallit Nunatta Parisimi isumaqatigiissummut ilanngunneqarnissaa.
Ulluni makkunani FN-ip silap pissusaa pillugu ataatsimeersuarnera De Forenede Arabiske Emiraterini illoqarfiit annersaanni Dubaimi ingerlanneqarpoq, taanna aallartippoq novembarip 30-ani naammassineqassallunilu decembarip aqqaneq aappaanni.
Sermitsiaq.AG-mi ilisimatinneqarnerput naapertorlugu Kalistat Lund massakkut Dubaimut ingerlaarpoq. Attaviginiaraluarparput, pingaarnertut paaserusullugu Kalaallit Nunatta UNFCCC-mut nalunaarutigissamaarneraa Parisimi isumaqatigiissummut ilanngunnissaq, taamaattorli Nuuk Dubailu imminnut ungasilluinnarmata akissutissarsiniarnerput utaqqimaaginnassavarput.
Kalaallit Nunaata NDC-mik pilersaarutaa 2030-miit sunniuteqalissaaq
Inatsisartut isumaqatigiissummut nunatta ilanngunneqarnissaanik aalajangernerisa malitsigisaannik Naalakkersuisut silap pissusaa pillugu periusissiassamik suliarinnittussaapput. Tassunga tunngatillugu Naalakkersuisut neriorsuuteqarput innuttaasut, inuussutissarsiortut inuiaqatigiinnilu soqutigisaqartut akuutillugit periusissiaq suliarineqassasoq.
Lund tassunga tunngatillugu aamma ilisimatitsinikuuvoq, silap pissusaa pillugu periusissiaq aallaavigalugu nunatta suliniummut tunniusseqataanissaa aalajangersarneqarumaartoq – ulluinnarni taanna NDC-mik taaguuteqartinneqarpoq, taassumalu imarisussaavaa suliassaqarfiit ataasiakkaarlutik silap pissusaanut aaqqiiniutissatut tunniusseqataanissaannut periusissiat. Tassungalu tunngatillugu Kalistat erseqqissaanikuuvoq Kalaallit Nunaat kiffaanngissuseqassasoq suliassaqarfiit aalajangersimasut peqataatinneqassanngikkallarnissaannik aalajangernissamut, soorlu assersuutigalugu aatsitassarsiorneq aalisarnerlu eqqissisimatinneqarallarsinnaasut. Manna tikillugu silap pissusaa pillugu periusissiamik takunngilagut, taassumali suli naammassineqannginnerata Naalakkersuisut akimmiffilernavianngilai Parisimi isumaqatigiissummut nunatta ilanngutsinneqarnissaanut, kingusinnerusukkullu nunatta NDC-qqaatissaa tunniullugu, silap pissusaa pillugu periusissiaq naammassineqarsimalereerpat. Taamatuttaaq nalunaarutigineqareerpoq NDC UNFCCC-mut tunniunneqarpat 2030-miit sunniuteqarluni aallartikkumaartoq.
FN-ip amigaataanut matussuseeqataalluarsinnaavoq
Silap pissusaa pillugu periusissiassaq 2021-mili ilimasaarutigineqarnikuuvoq, Kalistat Lund Sermitsiaq.AG-mut novemberimi 2021-mi erseqqissaammat periusissiaq aallartinneqalersoq.
Maannali pissutsit allanngornikuummata, aammalu Kalaallit Nunaat Parisimi isumaqatigiissummut ilanngunneqarnissaanik aalajangernerup malitsigisaanik periusissiassaq taanna suli saqqummerani allanngortinneqartariaqarsimasoq ilimagissallugu pissutissaqarpoq.
Taamaattoq aamma Kalaallit Nunarput FN-ip silap pissusaanik annaassiniarnerani qitiusumik inissinnissaminut periarfissaqarpoq, tassami Kalistat periusissiamik tassunga attuumassutilimmik pingaaruteqarluinnartumillu kaasarfimmioqarpoq - nunarsuarmioqatigiit isaannik isigalugu - tassalu 2023-2028-mut CO2-nik unerartitsinissamut toqqorsivimmiititsinissamullu Kalaallit Nunaata periusissiaa.
Periusissiaq taanna aqqutigalugu nunatta aningaasarsiornikkut siuarsarneqarnissaa periariffarissaarnerulersinnaavoq, tassami nunarput neqerooruteqarami CO2-mik toqqorsiviulersinnaalluni, tassungalu atatillugu pinngortitap atortussatut tunniussinnaasai annertuumik atorlugit iluatsinneqarsinnaalluni.
Taamaattorli aamma Issittoq tassarpiaagami nunarsuarmi sumiiffinni tamanit annerpaamik silap pissusaata allanngorneranik takussutissiisoq, silallu kissatsikkiartupiloornerata malitsigisai nunatsinnit qanimut misigineqarnerata malitsigisaanik silap pissusaata allanngorneranut akiuunniarnermi nunarput annertuumik sunniuteqalernissaminut periarfissaqarluarpoq.