Kalistat Lund ernumavoq: Ajornanngippallaaqaaq umiarsuit imminnut ilisimasassarsiortutut taasarnerat

Avatangiisinut Naalakkersuisoq, Kalistat Lund (IA) assut ernumassuteqarpoq umiarsuit takornariartaatit pillugit, taanna naapertorlugu Tunup avannaarsuani nunamut eqqissisimatitamukarnissamut piumasaqaatit annikippallaarput.

Kalistat Lundip naalakkersuisoqatini Vivian Motzfeldt ilalerpaa umiarsuit takornariartaatit nunatta imartaani angalasinnaanerinut inatsisitigut malittarisassatigullu sukaterisoqartariaqartoq.

Kilde: Naalakkersuisut

Jensine Berthelsen

Published 14 September 2023 - 10:46

Annonse

Umiarsuaq takornariartaat Tunup avannaarsuani eqqissisimatitaasumi sulerisoruna? Apeqqut taanna innuttaasut arlallit inuit attaveqaqatigiittarfiisigut apeqqutigisaqattaarpaat, umiarsuup Ocean Explorer-ip 206-nik issimasullip ulluni arlalinni Ittoqqortoormiit avannaani Alpefjordimi ikkarleqqanera tunngavigalugu.

Avatangiisinut naalakkersuisoqarfik erseqqissaavoq, Aurora Expeditions, umiarsuup takornariartaatsip Ocean Explorerip ingerlatsisorisaa, akuersissummik pinikuusoq, Tunup avannaani nunap eqqissisimatitap kujasissuani nunatta imartaata killilikkap iluani, Kalaallit Nunaata avannaarsuani kangianilu nuna allanngutsaaliugassatut immikkoortitaq pillugu Namminersornerullutik Oqartussat nalunaarutaat aamma Danskit inatsisinik atortitsinermut ministeriaqarfiata nunami tassani angalasinnaanermut nalunaarutaat naapertorlugit.

Kalaallit Nunaata imartaani kangerluinilu imaatigut angalanissamut piumasaqaatit:

Umiarsuit Kalaallit Nunaanni isumannaatsumik angalaarnerat pillugu Søfartsstyrelsip nalunaarutaani kapitalimi umiarsuit ilaasartaatit 250- init amerlanerusunik ilaasoqartartunut tunngasumi, umiarsuarnut piumasaqaatit annertunerusumik sukannernerulersinneqarput.
Umiarsuit takornariartaatit assersuutigalugu ilisimasortaqartussaapput. Tamatuma saniatigut umiarsuit upalungaarsimanermut pilersaaruteqassapput, inuit ilaasut amerlassusaannik kiisalu ajutoornermi ikiorneqarnissap tungaanut piffissap ingerlanissaanut naatsorsuutigisanik eqqarsaatiginnittumik.
Taamatuttaaq umiarsuarnit allanit imaluunniit SAR-imi atortorissaarutinit ikiorneqarnissat piffissap naleqquttup iluani ajornassanngitsoq aammalu annaassiniarnissamut naammattumik pisinnaasaqartoq, umiarsuup naalagaata uppernarsarsinnaassavaa.

Visit Greenland-ip nittartagaani nunatsinnut takornariarniartut ilitsersorneqarput qanoq ilillutik Tunup avannaarsuanut pisinnaanersut:

- Nuna eqqissisimatitaq pitsaanerpaamik misigisassarsiorfigissagaanni umiarsuit ilisimasassarsiorlutik angalasartut ilaaffigineqarsinnaapput, taakku aasat tamaasa sumiiffik ornittarpaat. Ingerlatsiviit arlaallit taamatut angalaarnissamut neqerooruteqartarput – amerlanerit Islandimiit ilaallu Svalbardimiit angalallutik aallartittarput.

- Umiarsuit takornariartaatit amerlanertigut nunap eqqissisimatitap kujasissuani angalasarput, ilaasullu sumiiffinni assigiinngitsuni nunamut niullutik pinngortitamut kulturimullu tunngassuteqartunik misigisassarsiortoqarsinnaavoq.

Tassa Tunup Nunattalu avannaarsuani nuna eqqissisimatitaq ilisimasassarsiorluni angalanngikkaanni tikinneqaqqusaanngilaq.

"Ilisimasassarsiortutut" imminut taalluni akuersissummik pisinnaaneq ajornanngippallaartoq

Ikkarlinneq Naalakkersuisunut nalilersueqqinnissamik pisariaqartitsilersitsisoq qularutissaanngilaq, taakkumi inatsisit malittarisassallu misissoqqissaartinnialerpaat. Naalakkersuisoq Kalistat Lund isumaqarpoq ingerlatsisut ullumikkut sumiiffimmi angalaartartut imminnut umiarsuartut ilisimasassarsiortutut taasarnerat:

- Neriuppunga matumani pisumi tupatsitaarujussuaannartugut, tassami ajornerpaamik pisoqassagaluarpat ikiortissaasinnaasut qanoq ungasitsiginerit timitalimmik maanna takutinneqarpoq.

- Ernumassuteqarpunga ikkarlinnerit taamaattut siunissami nalaateqqissinnaanerat pillugu, tassami nunami eqqissisimatitami angalasinnaanermut aammalu kangerlunni piniariartarfiusuni aalisarfiusunilu angalasoqarsinnaaneranut malittarisassat taamak qasungatigisut ingerlatiinnassagutsigit peqqeriaannaavoq, Lund Sermitsiaq.AG-mut oqarpoq.

Motzfeldt: Ikkarlittoqarnerata ersersippaa inatsisitigut sukaterinissaq pisariaqartoq

Tassa Kalistat isumaqarpoq ajornanngippallaartoq umiarsuit takornariartaatit imminnut ilisimasassarsiortutut taallutik akuersissummik pissarsisinnaanerat, akuersissummillu pissarseriarlutik takornarianik umiarsuaq ulikkaariarlugu nunami eqqissisimatitaasumi allanilu ileqqut malillugit piniariarfiullutillu aalisarfiusartuni pulatertarnerat, tamannalu Naalakkersuisunut qaqikkusuppaa:

- Umiarsuit ilisimasassarsiutitut atornerarlugit akuersissutinik pissarsisarneq unitsinneqartariaqarpoq, piviusumimmi takornariartitsiinnartarput. Umiarsuaq ikkarlittoq takuinnartigu; Inuit 200-it sinnerlugit amerlatigisut ilisimatuujunngillat, takornariaappulli.

- Taamaammat sukaterisoqarnissaa pisariaqarpoq, Kalistat Lundip naalakkersuisoqatini, Vivian Motzfeldt ilalerpaa, taanna inatsisitigut malittarisassatigullu umiarsuit takornariartaatit nunatsinni eqqissisimatitanut kangerlunnullu angalasinnaanissaannut akuersissutinik tunniussisarnermi sukaterisoqarnissaa anguniarlugu sukaterisoqarnissaanik sulissutiginnittoqassasoq oqareersorlu.