Kammalaatilersornermik pasilliineq

Arfininngormat Berlingske Tidende-mi ilanngussami Politiko-mi Naalakkersuisut Siumumit aqunneqartut isornartorujussuarmik allaaserineqarput.
Berlingske-p nammineq paasissutissiinera malillugu aviisip nunatsinni politikkimi, atorfilinni inuussutissarsiornermilu nuimasuumik inissisimasut arlallit oqaloqatigisimavai. Paasisaqarfiit tamarmik assigiissumik oqaluttuarpoq upernaaq inatsisartunut qinersinerup kingorna, Hammond siuttunngormat, qanoq politikkikkut kulturi immikkut ittoq atuuteqqilersoq, tamatumani siuttut imminnut iternga tikillugu ilisarisimallutik. Paasissutissiisut Naalakkersuisut pasillerpaat politikkikkut tunngavilimmik atorfinitsitsisartutut, ikinngutinik ikiuiniartutut aammalu eqqumiitsunik soraarsitsisartutut, aviisimi allassimavoq.
Paasisaqarfiit arlallit Berlingskemut oqaluttuarput Carsten Frank Hansenimik atorfinitsitsineq ersarissumik politikkikkut tunngaveqarpasissoq. Taassuma Siumumeersoq inatsisartut siulittaasuat Lars-Emil Johansen aamma Aleqa Hammondip naalakkersuisoqarfiani pisortaq Svend Hardenbeg ikinngutigilluagarai, Berlingske paasissutissiivoq allallunilu 44-nik ukiulik Carsten Frank Hansen - manna tikillugu atorfia qaffasinnerpaaq tassaasimasoq Odensemi andelskasset immikkoortoqarfianni qulit missaannik sulisulimmi pisortaaneq - ilaqutariit Johansenikkut ikinngutigilluagarigaat, Berlingske naliliivoq.
Taamaasilluni Berlingskemut paasissutissiisut oqarput Siumumi partiip siuttuinit namminersorlutik oqartussat atorfinitsitsinermut ataatsimiititaliaanut politikkikkut tatisisoqarsimasoq, atorfik Carsten Frank Hansenimut tunniunneqassasoq. Taanna qinnuteqartunit arfineq-marlunnit naalakkersuisoqarfimmi pisortatut atorfinitsinneqarpoq.
Jan H. Lynge Pedersenimut tunngasoq
Berlingskep aamma oqaluttuaraa aviisip taasaatut "naalakkersuisoqarfimmi pisortamik ataqqisaallluartumik suliaminullu pikkorissumik Jan H. Lynge Pedersenimik" oqaluttuaq, taanna tunngavilersuuteqanngitsumik aningaasanut naalakkersuisumit Vittus Qujaukitsumit soraarsinneqarmat.
Qujanaq kingullermik, Nunatsinni politikkimik malinnaasut oqarput. Tassami Vittus Qujaukitsoq qanga KNI-mi qullersanit attaveqarnermut pisortatut soraarsinneqarsimavoq piffissami sivisuumi suliffimminiissimanngimmat - KNI-p ingerlatsinermut ataatsimiititaliaaniunngitsoq, tassani ilaatigut ilaasortaallutik Jan H. Lynge Pedersen aamma Vagn Andersen, Berlingske allappoq.
Soraarsitsineq tupaallannartoq Nunatsinni politikkimik malinnaasut malillugit politikkimi siuttunit partiimullu ilumoortunit atorfilinnillu ilumoortunit iliuutsit arlallit siullersaraat, namminersorlutik oqartussat allattoqarfianni inuussutissarsiornermillu ingerlatsivinni namminersorlutik oqartussanit pigineqartuni inunnik qaffasissumik atorfilinnik, ukiut ingerlaneranni Siumumut akerliusimasunik, malersuilernermi. Ilami upernaaq Siumut qinersinermi ajugaammalli atorfillit taarsersorneqalersimapput, Berlingske allappoq.
Svend Hardenbergip atorfinitsitaanera
Nunami atorfillit qaffasinnersaannut Svend Hardenbergimik atorfinitsitsineq, Siulittaasup Naalakkersuisoqarfiani naalakkersuisoqarfimmi pisortatut, Berlingskep taavaa politikkikkut tunngavilimmik atorfinitsitsinertut, Siumumut qanittumik attavilimmik.
Paasisaqarfiit arlallit Berlingskemut oqaluttuarput Aleqa Hammondip Svend Hardenberg kajumissaarsimagaa atorfimmut qinnuteqaqqullugu. Atorfimmut qinnuteqartut sisamaapput. Atorfitsinitsinermulli ataatsimiititaliap sisamanik ilaasortallip Hardenberg kasiilerpaat, allalu marluk atorfimmut piginnaasaqarnerusut, tikkuarlugit.
Tamatuma kingorna Naalakkersuisut naalakkiipput Hardenberg atorfimmut inassutigineqassasoq. Tassami Aleqa Hammondip naalakkersuisoqarfimmini pisortarerusuppaa, Berlingske allappoq oqarlunilu pisimasumi imaannaanngitsumi qinnuteqartut marluk qinnuteqaatitik tunuartissimagaat, naalakkersuisut akulerunnerat pakatsissutigalugu.
Tamatuma kingorna atorfinitsitsinermut ataatsimiititaliami ilaasortat marluk Hardenberg tikkuarpaat. Ilaasortat pingajuat suli akuersaarumanngilaq, sisamaasalu atorfik inuttassarsiuuteqqeqquvaa.
Oqaluttuaq inerneqarpoq Aleqa Hammondip Svend Hardenbergimik atorfimmut qaffasinnerpaamut atorfinitsitsineranik. Taanna juulip aallaqqaataani atorfinippoq. Atorfimmini ukiumut 985.000 koruuninik akissarsiaqarpoq, 98.500 koruuninik soraarnerussutisiaqarluni naammattumillu tapeqarluni, Berlingske allappoq.
Aningaasaliisut annilaangalerput
Berlingske malillugu Nuummi namminersorlutik oqartussani piffissami matumani atorfillit oqaluuseraat paasisinnaalluarlugu nunat allamiut aningaasaliisut, tassa aningaaseriviit soraarnerussutisiaqalernissamullu aningaasaateqarfiit, Kalaallit Nunanni aningaasaliinissaminnut annilaangalerpata. Atorfilinnut tamanna erloqinarpoq, aningaasaleerusuttunut attaveqarnermi suliniutinut aningaasaliisussarsiortunut, assersuutigalugu umiarsualiviliornernut mittarfiliornernullu aammalu aatsitassanik suliniutinut.
"Kalaallit Nunaannit oqaluttuat taamaattut amerlavallaalerpata tamanna aningaasaliiffigissallugu tatiginassutsimut eqquissaaq. Killissaalu tikingajalereerparput. Naalakkersuisut tatiginassuseq tamaat annaalerpaat. Naalakkersuisoqarfimmi pisortamik, peqquserlussimasutut unnerluutigineqartumik, pisimasoq ajorluinnarpoq. Naluara taamatut piumasaarsornermi suna eqqarsaatigineraat. Aningaaseriviit aningaasaliisartullu allat pasitsaakkunikku nuna imaluunniit iingerlatsivik pisortanik atorfinitsitsisartoq politikkimik ikinngutigiinnermillu tunngavilimmik, suliatigut piginnaasaqarnermik tunngaveqanngitsumik, tamanna ajortisaataalluinnassaaq", qitiusumik qaffasissumillu atorfilik Berlingskemut oqarpoq. Taassuma atorfini pissutigalugu kinaassutsi isertorpaa.
Transparency Greenlandimi pisortaq Anders Meilvang Berlingske malillugu isumaqarpoq piffissami kingullermi pisimasut Nuummi namminersorlutik oqartussanit ajorluinnartumik ingerlanneqarsimasut.
"Ingerlatsivik ajornartorsiortorujussuuvoq, allaffeqarfik susinnaanngilaq, piffissarlu ungasinnerusoq isigalugu tamatuma kingunerisinnaavaa aningaasanik nassaaruminaatsitsinissarput, tamakkua atorfissaqartikkatsigit Kalaallit Nunaata aatsitassanik suliniutit ingerlannissaannut", Anders Meilvang Berlingskemut oqarpoq.
Allaaserisaq tamaat atuarsinnaavat UANI