Kangiata Illorsua ammaanersiornissamut piariingajalersoq
Ilulissani Kangiata Illorsuassaanik sanaartorneq naammassineqangajalermat, illorsuup juulip aappaani ammarneqarnissaa maanna nalunaarutigineqarpoq.
![Kangiata Illorsua ammaanersiornissamut piariingajalersoq](https://image.sermitsiaq.ag/251907.webp?imageId=251907&width=960&height=642&format=jpg)
Sanasut sanaartugartik naammassingajalerpaat, illorsuaq siku, kulturi silallu pissusaata allanngoriartornera pillugit ilisimasanik najukkami najugalinnut, atuartunut takornarianullu nunarsuarmi tamarmeersunut siammarteriffittut atorneqartussaavoq.
Illorsuaq 2015-imili sanaartorlugu aallartinneqarsimasoq, issittumi sila akorngusiisaraluartoq aamma sanaartugaq annertungaluartoq pilersaarutaasutut piffissaliussap missingersuutillu iluini naammassineqartussanngorpoq, sanatitsisut pingasut Namminersorlutik Oqartussat, Avannaata Kommunia Realdanialu tusagassiorfinnut nalunaaruteqarlutik ilisimatitsipput.
1.500 kvadratmeterisut angitigisoq
Illorsuaq titartaasartumit Dorte Mandrupimit titartarneqarsimasoq 1.500 kvadratmeterisut angitigivoq, taakkunannga 900 kvadratmeteri kiassagaalluni.
![Kangiata Illorsua ammaanersiornissamut piariingajalersoq](https://image.sermitsiaq.ag/252020.webp?imageId=252020&width=960&height=642&format=jpg)
- Illorsuup qaava ammaannartuusoq aasaanerani ulloq unnuarlu uninngavigineqarsinnaavoq, tassa sumiiffiup eqqaani pisuttuarsimariarluni isikkivigissuarmi sukkulluunniit qasuersaartoqarsinnaavoq. Illorsuarmi 400 m2-isut angitigisumi takuniaasut ataavartumik saqqummersitaq ”Siku pillugu oqaluttuaq”, JAC Studiosimit ilusilersorneqarsimasoq Ilulissanilu pinngortitamik kulturimillu immikkuullarissunik kiisalu silap pissusaata allanngoriartorneranik takutitsisoq qimerluualaarsinnaavaat, tusagassiorfinnut nalunaarummi ilisimatitsissutigineqarpoq.
Internetsikkut takutitsineq
Aningaasaateqarfiit arlallit takutitsinissamut siammarterinissamullu aningaasaliissuteqarsimapput. Nordea-fonden nunarsuarmi meeqqat atuartut iluaqutigisinnaasaannik atuarfinni internetsikkullu atuartinneqartarnissaannut aningaasaliissuteqarsimavoq.
![Kangiata Illorsua ammaanersiornissamut piariingajalersoq](https://image.sermitsiaq.ag/252109.webp?imageId=252109&width=960&height=466&format=jpg)
- Ilulissani Kangiata Illorsua taamatut ineriartortitsinermi pingaaruteqarluinnartussaavoq, pinngortitarsuullu kusanaqisup paasineqarnissaanut annertusaaqataassalluni. Illorsuarmut takuniaasuinnaanngitsunut, aammali Kalaallit Nunaanni, Danmarkimi nunarsuullu sinnerani atuartut pinngortitaq internetsikkut takutinneqartassaaq. Nunarsuarmi sumiiffinni ikittuinnarni nunarsuatta ataasiusup allanngoriartortuarnera takuneqarsinnaallunilu misigineqarsinnaavoq, Visit Greenlandimi pisortaaneq Hjörtur Smárason oqarpoq.
Kommunimut nukittorsaataassasoq
Kommunimi pisortaanerup Nick Nielsenip oqaatigaa, illorsuaq ”najukkami inuiaqatigiinnut suliffissaqartitsinikut pitsaasumik ineriartortitseqataassasoq aamma Ilulissat ullumikkumut sanilliullugu takornariarfigissallugu suli kajuminnarnerulersissagaa”.
Illorsuarmi pisortaassaaq Elisabeth Momme.