Kangiata Illorsua kalaallisut, qallunaatut tuluttullu ilinniutinik saqqummersitsivoq
Ilulissani Kangiata Illorsua ullumikkut atuartitsinermi pilersaarusianik 68-nik immikkuullarissunik saqqummersitsivoq, taakku Kalaallit Nunaata pinngortitaanut assigiinngisitaartumut kulturianullu Kalaallit Nunaanni nunarsuullu sinnerani atuartunut qaninnerulersitsissaaq.
Ilulissani Kangiata Illorsua ilinniutinik arlalinnik saqqummersitsisuuvoq, taakku meeqqat atuarfianni atuartunut trin-inut assigiinngitsunut aaqqissugaapput, Kalaallit Nunaata pinngortitaa immikkuullarissoq, kulturikkut oqaluttuarisaanera aammalu Kangia kiisalu Qeqertarsuup Tunua pillugit ilisimasanik ingeratitseqqinnissaq siunertarineqarluni.
Sumiiffiit pinngortitaq aamma kulturi pillugit oqaluttuassaqarluarput, ilisimatusarnermi paasisanik nutaanik tunngaveqarpoq Kalaallit Nunaannilu, Danmarkimi USA-milu ilisimatusartunit arlalinnit suliarineqarsimallutik.
Atuartitsinermi atortussani sammisat amerlaqaat, taakkunanilu Ilulissani Kangiata Illorsuani ”Sermeq pillugu Oqaluttuaq” pillugu saqqummersitami ilisimasat tamarmik ilanngunneqarsimallutik. Atuartitsinermi atortussat Nunatsinni Ilisimatusarnermik Siunnersuisoqatigiiffiata periusissiaa nutaaq malinneqarpoq, tassa Kalaallit Nunaanni ilisimasat pilersinneqartut Kalaallit Nunaanni inuaqatigiinnut iluaqutaanissaat.
Nunani tamalaani atorneqarsinnaasoq
Andreas Peter Ahlstrøm, GEUS-mi Sermersiornermik Silallu Pissusianik Immikkoortortaqarfimmi siunnersortit pisortaata suliassaqarfiit marluk ataatsimoortinneqarnerat nuannaarutigaa:
- Tupinnaqaaq atuartitsinermi atortussani ilisimatusarnerup ilinniarnerullu akuleriissinneqarnerat, taanna oqarpoq.
Atuartitsinermi pilersaarusiat 68-it Kalaallit Nunaanni aamma nunani allani atuartunit atorneqarsinnaapput, atuartitsinermi atortut kalaallisut, qallunaatut tuluttullu pissarsiarineqarsinnaammata.
Taamaattumik ilinniusiortut Kalaallit Nunaat pillugu ilisimasanik siammartereqataanissaq aamma Kalaallit Nunaata pinngortitaa kulturialu immikkuullarissut qallunaat atuarfiini aamma nunarsuaq tamakkerlugu atuartunit tuluttut oqaaseqartunit paasinninneq annertunerulissasoq neriuutigaat.
Tamanit atorneqarsinnaasut
Atuartunut Kalaallit Nunaata pinngortitaa kusanartoq oqaluttuarisaaneralu pillugit ilikkagaqarnissamut ajornannginnerulersitsinissaq anguniagaasoq, Kangiata Illorsuani pisortap, Elisabeth Mommep oqaatigaa.
- Atuartitsinermut atortut suliami tassani pingaarutilittut inissisimapput, taanna oqarpoq.
Atuartitsinermut atortut aaneqariaannaapput, Kangiata Illorsuatalu nittartagaaniipput, tamatumalu ilinniartitsisunut atuartunullu sumiiffiit pillugit misissuinissamut ilikkagaqarnissaq ajornannginnerulersippaa.