Kangilinnguit Narsarsuarmut
Sapaatiummat unnukkut Qaqortumi qinersisartunik kalaallisut ataatsimiititsinermi sakkutoorqarfiup Narsarsuarmut nuunnissaanik siunnersuut partiit isumaqatigaat.
Lars-Emil Johansenip, Siumut, Sofia Rossenip, IA, aamma Jens B. Frederiksenip, Demokraatit, Kangilinnguani sakkutooqarfiup Århusimut pinnagu Narsarsuarmut nuunnissaanik qinersisartup siunnersuutaa tikilluaqquaat.
Partiit pingasuullutik apeqqutip Folketingimi malersorneqarnissaanut piareersimapput.
Atassummeersulli Jensine Berthelsenip siunnersuut isumaqatigivallaanngilaa.
- Sakkutuunut tunngasut sakkutuunit aaqqinneqartariaqarput, sulissutigerusupparpulli sakkutooqarfiup Kalaallit Nunaanniiginnarnissaa.
Sapaatiummat Qaqortumi unnukkut Qaqortumi qinersisartunik ataatsimiititsinermi siunnersuut saqqummiunneqarpoq.
2007-ip aallartinnerani Forsvarskommandop nalunaarusiakkut illersornissamut ministereqarfimmut siunnersuutigisimavaa Kangilinnguani sakkutooqarfik Århusimi Søværnets Operative Kommandomit tiguneqassasoq.
Tassa imaappoq, Kalaallit Nunaanni Sakkutooqarfik aamma Savalimmiuni Sakkutooqarfik kattunneqassapput Århusimilu Søværnets Operative Kommandomit tiguneqassallutik, Århusimilu Atlantikup avannaanut immikkoortoqarfiliortoqassasoq, Nuummi Torshavnimilu attaveqarfinnik tapertalerlugit.