Kanukoka: Arlaanik pisoqarniarpoq
Ataatsimeersuarnermi qulequtarineqarpoq. 'Kommunit nukittuut - innuttaasut pillugit'
- Kattuffiupsiunissaa pillugu ataatsimeersuartut aalajangiinerat ataqqivara, tamanna uannut siulersuisunullu qanorluunniit kinguneqassgaluarpat, Kanukokap siulittaasua Enok Sandgreen sermitsiaq.ag-mut oqarpoq.
Marlungormat aallartitat 15-it, siulersuisuni ilaasortat tallimat borgmesterillu tallimat natoqqasumik karttuffiup siunissaa eqqartorpaat, arlaanilli pisoqartussaagunarpoq.
Januaarip aallaqqaataani 2009-mi kommunit kattutereernerisa kingorna Kakukokap siunissami sulinissaani allanngorujussuartoqarnissaa kommuninit sisamanit sulissutigineqarpoq, taamaattumik ukiamut immikkut ittumik ataatsimeersuartoqarnissaa piumasaraat, allannguutit sukkasuumik piviusunngorsinnaaniassammata.
Kommune Kujalliup piumasaraa siulersuisut peerlugit borgmesterinik sisamanit nikittaallutik siulittaasuusartussanik taarserneqassasut. Kommuneqarfik Sermersooq aamma Qaasuitsup Kommunia piumasaqarput kattuffik piffinnut nutaanut naleqqussassasoq. Qeqqata Kommuniata piumasaraa 2011-mi akiliutissaq 12.857.000 kronit, 20 procentimik annikillineqassasoq, pissutigalugu kommunit ilaasortaasut ukiup ataasiinnaap ingerlanerani 18-iniit sisamanut ikilineqarmata.
Siulittaasup Enok Sandgreenip marlunngormat siusinnerusukkut oqaaseqaatini saqqummiuppaa qulequtaqartoq 'Kommunit nukittuut - innuttaasut pillugit'.
- Siunissami qanoq ittumik aaqqissuussaassagaluaruttaluunniit kommunit nukittuut pisariaqartippavut, innuttaasut pillugit, Enok Sandgreen erseqqissaavoq.
- Kommunit nukittuppata atugarissaarneq tamatta kissaatigisarput angujuminarnerussaaq. Kommunit nukittuppata innuttaasunik kiffartuussineq pitsaanerullunilu isumannaannerussaaq.
Maannakkorpisaq Kanukokap inissisimanera oqaluttuariniarlugu Enok Sandgreenip taaliortorsuup Henrik Lundip taalliaa 'Qamuuna ilumigut sapiissusilik' issuaaffigaa, tassanilu pissutsinut allanngorartunut nalequssarnissaq oqariartuutigineqarpoq. Tamannalumi Kanukokap Ilulissani ulluni makkunani pisariaqartippaa.