KANUKOKA: Atuarfimmut aningaasat naammattumik pissarsiffigaavut?
Kommuneqarfiit kattuffiat isumaqarpoq meeqqat atuarfiat angusaqarniarnerusariaqartoq, tamatumuunakkut ilinniagaqartitsineq qaffanniarlugu.
KANUKOKA-p siulittaasuata Martha Abelsenip ukiortaami oqaaseqaataa:
"Kommunit 18-it kommunersuarnut sisamanut kattunnerisa kingorna ukiut 2009 aamma 2010 aaqqissuussinerup nutaap aallartisarneranut atorneqarput.
Ingerlaqqinnissami kommunini nutaani misilittakkat taarseeqatigalugillu atorluarniarneqassapput.
Kommuni sammisaqarfimmut pikkorissinnaavoq kommunip allap iluaqutigisinnaasaanik. Nutaanik nassaarniartariaqanngilaq tamanna allap atoreersimappagu. Aaqqissuusseqqinnermi komunillu kattunneranni pineqarpoq qulakkiissallugu Kalaallit Nunaanni innuttaasunik tamanik pitsaasumik qularnaatsumillu sullissinissaq.
KANUKOKA siullerpaamik Namminersorlutik Oqartussanut atatillugu kommuninilu suleqatigiinnermi kommunit nukittuumik inissisimaffigissavaat. Kattuffiup annertunerusumik isumagissavaa kommunini sulisut politikerillu piginnaasaasa ineriartortinnerat.
Nuannaarutigaara inuiaqatigiit aningaasaataat taama amerlatigisut atuartutsinermut atortaratsigit, pingaartumik meeqqat atuarfianni. Meeqqat atuarfiat inuiaqatigiinnik ingerlalluartunik tunngaviliisuussaaq. Apeqqutaavoq aningaasat meeqqat atuarfiannut atukkavut siunertalimmik atornerivut. Tamanna oqallisigisariaqarparput. Angusaqarniarnerussaagut ilinniagaqartitsineq qaffassarniarlugu.
Piffissami kingullermi uuliasiornermi pitsaasumik ineriartortoqalersimavoq, aammalu aatsitassarsiornermi annertuumik suliniuteqartoqalissalluni.
Tamanna Namminersornerunermiit Namminersornermut ikaarsaariarnermut naapertuuppoq, kissaatiginartikkatsigu imminut napatittumik aningaasarsiulernissarput. Kommunit tunuarsimaassanngillat. Akerlianik kommunit tamarmik piareersimassapput suliniuteqarlutillu, suliniummik nutaamik kommunip aningaasarsiorneranut suliassaqartitsineranullu iluaqutaasumik aallartitsiniartoqaleraangat.
Innuttaasunik pitsaasumik sullissineq inuussutissarsiornikkut aningaasarsiornikkullu ineriartornermut, kikkunnut tamanut iluaqutaasumut, sinaakkutasseeqataavoq. Taamatut oqaaseqarlunga kikkut tamaasa ukiortaami pilluaqquakka piumassuseqarluaqqullugit unammilligassanik tigusinissaannik, tamanut iluaqutaasumik".