Kanukoka persarineqarpoq
Demokratit kattuffik atorunnaarsinniarpaat - Kommunip Kujalliup nukittorsarusuppaa.
Kommunit kattuffianni siulittaasoq Kanukoka Enok Sandgreen, Siumut, persarineqarpoq pingasunngormat ullaakkut Ilulissani Hotel Arcticimi nal. 09.00 ataatsimeersuarneq ammarneqarmat.
Nuummi Inatsisartut atatsimiittarfianni Demokratit kissaatigaat kattuffiup taamaatinneqarnissaa, Ilulissanilu KOmmune Kujalliup kissaatigaa kattuffiup nukittorsarnissaa Enok Sandgreenip peerneratigut.
Demokratit kattuffiup taamaatinnissaanut piumasaqarnertik ingerlatiinnarpaat, Inatsisartuni issakkuni Naalakkersuisut kommunit pillugit nalunaarusiormata.
- Demokratini soorunami kikkut tamarmik peqatigiiffiliorsinnaanerat ataqqivarput, kisiani aamma isumaqatigiinniarfitsinnut isummernissatsinnut periarfissaqarpugut, partiimiit Michael Rosing oqarpoq.
Ullumikkut Naalakkersuisut kommunini atugarisat nalinginnaasut pillugit Kanukokamik isumaqatigiinniartarput, Demokratiniilli kattuffik kommunerujussuit oqaloqatigineranni kinguarsaatigut isigineqarpoq .
Ullumikkut ataatsimmeersuarnermi Kommune Kujalleq siunnersuuteqarpoq, siulersuisut maannakkut tallimaasut sisamanngortinneqarnissaannik borgmesterinik sisamaasunik inuttaqarluni.
- Kattuffipput suli aaqqissuunneqarsimavoq soorlu kommunit 18-iugallarmata namminersornerullutik oqartussat ataaniillutik, borgmester Simon Simonsen, Siumut, sermitsiaq.ag-mut oqarpoq.
Kujataani kommunip siunnersuutigaa maannakkut kattuffik kommunalbestyrelsemi ilaasortanik tallimanik siulersuisoqarunnaarluni borgmesterinik sisamanik taarserneqassasut, kingoraartaallutik siulersuisuusartussanik.
- Taamaaliornikkut suleriaatsip sukkanerulernissaa kissaatigarput, Kanukokami atorfinittat ilagalugotkommunit sisamat Kanukokap pitsaanerusumik ingerlalernissaanut siunnersuuteqarlutik, Simon Simonsen oqarpoq, kissaatigallu ukiamut immikkut ittumik ataatsimeersuartoqassasoq.