KAR-imut aningaasaliissutit 2 milliarder koruuninik annertussusileqalersut

Naalakkersuisut sisamanngornermi Kalaallit Airports Holdingimut 275 millioner koruuninik aningaasaliissuteqaqqipput. Aningaasaliissutigineqartut taamaalillutik 1.999.739.000 koruuninik annertussuseqalerlutik. Naalakkersuisut katillugit 2,5 milliarder koruuninik aningaasaliissuteqarsinnaatitaapput.

Kalaallit Airports

THOMAS MUNK VEIRUM

Published 24 November 2022 - 07:10

Annonse

Naalakkersuisut sisamanngornermi Kalaallit Airports Holdingip Nuummi, Ilulisssani Qaqortumilu timmisartoqarfiliorneranut miliuunilikkaanik aningaasaliissuteqaqqipput.

Naalakkersuisut ilisimatitsissutigaat, immikkut ittumik ataatsimeersuartoqarnerani 275 millioner koruuninik aningaasaliissuteqaqqittoqarsimasoq.

- Taamaalilluni aningaasaliissutissat akuersissutigineqarnerisigut Kalaallit Airports Holding A/S-imut katillugit 1.999.739.000 koruunit aningaasaliissutigineqarput, taakkunannga 1.905.439.000 koruunit aningaasaliissutaapput sinneruttullu 94.300.000 koruunit taarsigassarsiaritinneqarlutik, Naalakkersuisut Siulittaasuata Naalakkersuisoqarfianit ilisimatitsissutigineqarpoq.

Aningaasat ukunannga pissarsiarineqarput

Nunatta Karsiata 2019-imut naatsorsuutitigut sinneqartooruteqarneranut kiisalu akileraarutitigut isertitanut atatillugit 151.000.000 koruunit Piffissaq ungasinnerusoq eqqarsaatigalugu aningaasaliissuteqarnissamut Aningaasaateqarfimmit pissarsiarineqarput.

124.000.000 koruunit 'Aktiaateqarluni ingerlatseqatigiiffinnut toqqaannartumik aningaasartuutit' pillugit aningaasanut inatsimmi kontomit pissarsiarineqarput. Kontomit aningaasat Namminersorlutik Oqartussat ingerlatseqatigiiffiutaasa immikkut iluanaarutaanneersuupput kiisalu 45 millioner koruunit ammassanniarnermit immikkut isertitaneersuullutik, 2022-mut aningaasanut inatsisip isumaqatigiissuteqarfigineqarneranut atatillugu immikkoortinneqarsimasunit.

Pissarsiffik: Naalakkersuisut Siulittaasuata Naalakkersuisoqarfia aamma 2022-mut Aningaasanut Inatsit

Aningaasaliissutiginreqartut siorna aningaasaliiissutigineqartunit annertunerulaarput, siornami Naalakkersuisut ingerlatseqatigiiffimmut 252 millioner koruuninik aningaasaliissuteqarput.

Naalakkersuisut katillugit 2,5 milliarder koruninik aningaasaliissuteqarsinnaatitaapput, Naalakkersuisullu taamaalillutik timmisartoqarfiliornernut aningaasaliissutissatut aalajangiunneqarsimasut ilaannik naammassinnittussanngorlutik.

Immikkut ittumik ataatsimeersuartoqarnerani aamma ingerlatseqatigiiffimmi ileqqoreqqusat arlallit allanngortinneqarput. Allanngortitsinermi Kalaallit Airports Holdingimut atatillugu siunertarisaq annertusineqarpoq.

Mittarfeqarfiit Kalaallit Airportsip suliffeqarfissuanut ilaatilerniarlugit aktiaatileqatigiiffinngortinneqarnissaat kiisalu Tasiilami Ittoqqortoormiinilu timmisartoqarfiliornissamut misissueqqaartoqarnissaa Inatsisartunit akuerineqarmata allannguisoqarpoq.