Karen Jespersenip kalaaliaqqat ikiorusuppai
Suut tamaasa misilittariaqarput, isumaginninnermut ministeri Karen Jespersen (V) oqarpoq, MIPI-p nalunaarusiaa saqqummiunneqareersorlu.
Kalaallit Nunaanni meeqqat inuuniarnikkut atugaat sakkortuut isumaginninnermut ministerinngorlaaq Karen Jespersen (V) ikiuukkusulersippaa, naak tamanna nammineq akisussaaffiiata ataaniinnani Namminersornerullutik Oqartussaniikkaluartoq.
- Meeqqat tunngaviulluinnartut soorlu nerisassat inissaqarnissarlu amigaatigaat, minnerunngitsumillu angajoqqaat taakkununnga ikiuutinngimmata. Tamanna ukiorpassuarni ingerlasimavoq, taamaammat mianersornissamut kalerrisaatitut aallartittutullusooq ilerput, Karen Jespersen Ritzau-imut oqarpoq.
- Taavunngarusuleqqavunga, Namminersornerullutik Oqartussat oqaloqatiginiaannarnagit, aammali najugarisani innuttaasut orninniarlugit aammalu suliniaqatigiiffiit oqaloqartigiartorlugit, isumaginninnermut ministerinngorlaaq sapaatip akunnerata siuliani ivertinneqartoq oqarpoq.
- Suut tamarmik misissorneqassapput. Kalaallit nammineq piumassappata ikiuunnissannut piareersimavunga. Uteriisernissaq mianersuuttariaqarpoq, meeqqat atugaat pillugit nalunaarusiaq nutaaq atuareerlugu taama oqarpoq.
Meeqqat Inuusuttullu pillugit Ilisimasaqarfiup (MIPI) nalunaarusiaata takutippaa kalaallit meerartaannut ilaqutaasut 39 procentii pisariaqartitsineq naapertorlugu ikiorsiissutinik pisartagaqartut.
- Uanga nammineerlunga Kalalallit Nunaanni angalasimavunga. Inuiaqatigiit taamaattut kulturitoqartik annaanagu inooriaatsinut nutaanut akornuseratik pulanissaat pingaartuuvoq. Ilaqutariit ajalusooraangata ajutoorneq annertusarpoq.
Angajoqqaatut piginnaasaqarnerup ineriartortinnissaa, attatiinnarnissaa pilerseqqissinnaaneralu pillugit politikkeqarnissaq pingaartuuvoq, Karen Jespersen oqarpoq.
Peqatigitillugu erseqqissarpaa Kalaallit Nunaata Danmarkillu akornanni kulturikkut ilaqutariissutsikkullu assigiinngissuteqartuusoq.
Ajornartorsiutit assigiimmik qisuariarfigineqarsinnaanngillat, kisianni tunngaviusumik meeqqat pitsaasumik inuuneqarnissaat tamani atuuttuuvoq, Karen Jespersen isumaqarpoq.
Savalimmiormiut isumaginninnermut tunngasut 1990-imi tigummatigit qallunaat atorfilittaat qaammatini arlalialunni Savalimmiuniissimapput.