Karl-Kristian Kruse: Kangerlussuup Narsarsuullu matuneqarnissaat siunertarinngilarput

Siumup oqaaseqartartuata Karl-Kristian Krusep naalakkersuisoq Vittus Qujukitsoq assigalugu erseqqissaassuteqarpoq.

Siumuts ordfører, Karl-Kristian Kruse fremhævede i lighed med naalakkersuisoq Vittus Qujaukitsoq (NQ).

- Innuttaasut ulloq novembarip 15-iat pingaarutilittut eqqaamasalissagaat, taanna oqaaseqaammini oqarpoq.

Maanna tunngavigineqartoq tunngavigalugu mittarfiit aalajangiiffigineqarpata, ilungersunartumik kinguneqarnissaat partiit illuatungiliuttut ernumassutigaat. Karl-Kristian Krusep tunngavilersuut tamanna illuatungilerpaa.

- Taamatut aningaasaliinngikkutta siunissarput ulorianartorsiorfiussaaq, taanna oqarpoq.

Karl-Kristian Krusep oqaaseqaateqarnerata kingorna illuatungiliuttut sakkortuumik isornartorsiuipput. Kangerlussuup aamma Narsarsuup siunissaat erseqqissarneqanngitsoq, Hans Enoksenip (PN) ilaatigut oqaatigaa. Mittarfiit taakku marluk qulimiguunillunnut mittarfinngortinneqarsinnaanerat nunaqarfinnik matusissasoq, taanna isumaqarpoq.

Karl-Kristian Krusep tamanna ilumuunnginnerarpaa.

- Nunaqarfiit matuniarnerinik oqaiartuuteqarneq tunngavissaqanngilluinnarpoq, taanna oqarpoq.

Múte Bourup Egedep (IA) akissut taanna apeqquteqarfigaa.

- Kangerlussuarmi aamma Narsarsuarmi atlantiku qulaallugu tikittarnerit matuneqarpata, atorfiit annaaneqarnerinik kinguneqassaaq.

Inuiaqatigiit aningaasaqarnerannik Deloittep suliarisaanik misissueqqissaarneranut taanna innersuussivoq, periarfissani tamani naatsorsorneqartuni takutinneqarpoq, mittarfinni suliffiit malunnaatilimmik ikinnerulissasut – tamatumalu kinguneranik nunaqarfinnit nutsertoqassasoq.

Deloittep nalunaarusiaa allaasoq, politikkikkullu aalajangiinerit allaasut, Karl-Kristian Kruse oqarpoq.

- Politikkikkut tamanna anguniagarinngilarput, taanna naqissusiivoq, taannalu kommunit peqatigalugit suleqatigiissitanut marluusunut, nunaqarfiit mittarfeqarfiusut siunissaannik oqaluuserinnittussanut innersuussivoq.

Tillie Martinussenip (Sam) aamma Deloittemit nalunaarusiaq eqqaavaa.

- Kangerlussuarmi aamma Narsarsuarmi mittarfiit millineqarnissaat nalunaarusiami naatsorsuusianut piumasaqaataavoq, taanna oqarpoq. Taamaaliortoqanngippat suliniutip akilersinnaassusaata qanoq innissaanut Tillie Martinussenip ernumassuteqarnini oqaatigaa.

- Una suliniut ajutuussappat allamik pilersaaruteqanngilagut.

Karl-Kristian Krusep matumani aamma Deloittep naatsorsuusiaanut erseqqissumik tunngasunik akissuteqanngilaq.

Kangerlussuarmit aamma Narsarsuarmit innuttaasunik nuussuinermut 30 millionit koruuninik immikkoortitsisoqartussaanera, Múte Bourup Egedep (IA) oqaatigaa. Aningaasat taakku Deloittep nalunaarusiaani allaqqapput, tassani innuttaasut nuutsinneqarnerisa qanoq akeqarnissaa naatorsorneqarsimavoq. Aningaasanut inatsisissatut siunnersuummi tamatumunnga aningaasanik immikkoortitsisoqarsimanngilaq.