Katersuunnissat inerteqqutigineqarnerannut ilitsersuut inissittoq
Naalakkersuinikkut siunertallit aamma allatut isummernissamik siunertallit qanoq isumaqarpat? Namminersorlutik Oqartussat ilitsersuummi nutaami tamanna itisilerpaat.
Namminersorlutik Oqartussat ilitsersuummik katersuunnissat inerteqqutigineqarnerannut maleruagassat itisilerneqarfigiisaat maanna naammassivaat.
Ilitsersuut pilersinneqarpoq katuffinnit arlalinnit sakkortuumik isornartorsiuisoqareersorlu, taakkunanngami katersuunnissat inerteqqutaanerisa qanoq paasinissaat nalornissutigineqarsimavoq.
Maleruagassani "katersuunnernut naalakkersuinikkut allatulluunniit isummernissamik siunertalinnut" inerteqquteqarnerup atuutinnginnera ilaatigut paatsiveerunnermik pilersitsisimavoq.”
Ilitsersuummi "politikkikkut siunertallit" ima itisilerneqarpoq:
- Naalakkersuineq pillugu katersuunnerit, Inatsisartunit, Naalakkersuisunit, Kommunalbestyrelsinit naalakkersuinikkullu partiinit aaqqissuunneqartut “naalakkersuinikkut siunertaqartutut” paasineqassapput.
- Katersuunnerit, sulisartut peqatigiiffiinit, soqutigisaqaqatigiinnit, timersoqatigiiffinnit il.il. aaqqissuunneqartut, tunngavimmikkut naalakkersuinikkut allatulluunniit isummernissamik siunertalinnik aallaaveqanngillat, taamaattorli matuma kinguliani allassimasut takukkit.
"Allatullu isummernissamik siunertallit":
- Katersuunnerit isummersorfiusut katersuunnerupput, inuiaqatigiinni issutsinik saqqummiussiviusut, soorlu akerliussutsimik takutitsiviusut.
- Katersuunnerit, allatut isummernissamit imaluunniit naalakkersuinikkut isummernissamit allaanerusunik saniatigut allanik siunertaqarfiuppata, katersuunnerit taamaattut siunertaqarfii immikkoortillugit isigineqassapput.
- Tassalu katersuunnerit taamaattut maleruagassat assigiinngitsut marluk malillugit suliarineqartassapput:
- Allatut isummernissamik imaluunniit naalakkersuinikkut isummernissamik siunertaqarfiusunut katersuunnissamut, taakkununnga inerteqquteqarneq atuutissanngilaq.
- Katersuunnissap siunertaata aappaanut, tassunga inerteqquteqarneq atuutissaaq. Taakku saniatigut naatsorsuutigineqarpoq, Nakorsaaneqarfiup eqqiluisaarnissamut aamma naapertuuttumik pissusilersornissamut innersuussutai kikkunnit tamanit malinneqassasut.
Ilitsersuummi inerteqqutit allat aamma itisilerneqarput.
Katersuunnissat inerteqqutigineqarneranni naatsumik oqaatigalugu pineqartoq tassaavoq, inuit illup iluani aaqqissuussinerni katersuussimasut amerlanerpaamik 100-nik amerlassuseqartarnissaat, silamilu aaqqissuussinerni amerlanerpaamik 250-inik amerlassuseqartarnissaat.
Pikkorissarnermut aaqqissuussinermulluuniit peqataajartorluni kommunimut allamut angalanissaq aamma inerteqqutigineqarpoq.
Sisamanngornermi tamanut saqqummiunneqasassoq
Kisianin ilitsersuummi allassimavoq, assersuutigalugu inuit inunnik allanik atuartitsisussat imaluunniit aliikkusersuisussat, peqataasutut isigineqanngitsut taamaattumillu inerteqquteqarnermut ilaanngitsut.
Ilitsersuut mailikkut kattuffinnut arlalissuarnut, ataasinngornermi ataatsimiinnermut, kattuffiit Namminersorlutik Oqartussani atorfilittanut apeqquteqarfigisinnaasaannut, peqataasimasunut pingasunngornermi unnukkut nassiussuunneqarpoq.
Namminersorlutik Oqartussat mailimi paasissutissiipput, ilitsersuut sisamanngornerup ingerlanerani tamanut saqqummiunneqasassoq.