Katsorsaasartunut maleruagassat
Peqqinnissaqarfiup aqunneqarneranut inatsisissap aappassaaneerneqarnera.
Kiropraktik, healing, coaching, Akupunktur, kranio-sakral-terapi, meeqqaap ilormiup katsorsarnera, thai-massage. Tamakkuupput ukiuni kingullerni nunatsinni peqqinnissaqarfiup saniatigut immikkut ittumik katsorsaasartorpassuit takkussuuttut, Nuummilu namminersorlutik oqartussat qullersaqarfiata ungasianiit katsorsarnera 2002-mi juullimi nunarsumi tamarmi tusarneqarpoq.
Inatsisartut peqqinnissaqarnermut ataatsimiititaliaa isumaqarpoq piffissanngortoq immikkut ittumik katsorsaasartunut maleruagassiornissaq. Marlunngorpat ualikkut Inatsisartuni peqqinnissaqarfiup aqunneqarnera pillugu inatsisissap aappassaanerneqarneranut atatillugu ataatsimiititaliap isumaliutersuutaanni taama piumasaqarneq saqqummiunneqassaaq.
– Napparsimasorpassuit immikkut ittumik katsorsartinnisartik toqqartarpaat, Demokraatiniit Astrid Fleischer Rex oqarpoq.
Peqqissutsimut Naalakkersuisoq Agathe Fontain Inuit Ataqatigiinneersoq isumaqataanngilaq: – Ullumikkut nunatsinni immikkut ittumik katsorsaasartut ikittuararsuupput. Pisariaqalerpat maleruagassiornissaq orniginarnerpaavoq. Aamma eqqarsaatigisariaqarpoq Peqqinnissaqarnermut naalakkersuisoqarfik tassaanersoq susassaqarfimmi inatsisiliortussaq.
Taamnnali peqqinnissaqarnermut ataatsimiititaliamit isumaqatigineqanngilaq, taamaattumik ullumikkut inatsisiliuunneqartariaqarpoq: - Susassaqarfimmi inatsisiusut malillugit immikkut ittumik katsorsaasartut naleqqussarnissaminnut periarfissaqartariaqarput.