Kattuffiup siulittaasua Siumumi ataatsimeersuarnissaq sioqqullugu: Atugarissaarneq namminiilivinnissamit siulliunneqartariaqarpoq
SIK-p siulittaasuat Jess G. Berthelsen kattuffimmit partiiminut oqaaqqissaaruteqarpoq. Inuit nalinginnaasut inuuniarnerminni atugasarisaat naammaginarsitinnagit Kalaallit Nunaatalu aningaasaqarnera pitsaanerusumik ataqatigiilersinnagu namminiilivinnissaq puiorneqarli, taanna oqarpoq.
Aningaasaqarneq ingerlalertariaqarpoq, peqqinnissaqarfik annertuumik kivinneqartariaqarpoq, meeqqat atuarfiat ilinniartitaanerillu pisariaqartinneqaqisumik misissuiffigineqartariaqarput, pingaartumillu sulisartunut akissarsiortunut nalinginnaasunut inuuniarneq pitsaanerujussuusariaqarluni.
Taama kattuffiup siulittaasua, Jess G. Berthelsen, SIK, Siumup sapaatip-akunnerata naanerani Qasigiannguani ataatsimeersuarnissaq sioqqullugu, oqartoq, aviisi AG allappoq.
Jess G. Berthelsenip, Siumumut ukiorpassuarni ilaasortaasup, mianersoqqussutigaa, ataatsimeersuarneq Kalaallit Nunaata namminiilivinnissaa pillugu oqallinnernut sivisuunut atorneqassappat, partii kukkorujussuassasoq. Taarsiullugu ataatsimeersuarnermit sulisartut akissarsiortut nalinginnaasut – amerlanertigut akissarsiakitsuusut – meeqqat, inuusuttut utoqqaallu ullumikkut ulluinnarni ajornartorsiutaannut aaqqiissutissanik nassaarniarnissat pingaartinneqartariaqarpoq.
- Kalaallit Nunaat ukiuni kingullerni ajornartoornernik ajunngitsumik aqqusaagaqartarsimagaluartoq, innuttaasorpassuit ilungersunartorsiorput. Kattuffilerisutut ullut tamarluinnaasa inuit nalinginnaasut ajornartorsiutaat qanimut sammisarpakka; nerisassaqarnissaq, inissaqarnissaq inuussutigineqarsinnaasunillu akissarsiaqarnissaq pineqarput, Jess G. Berthelsen AG-mut erseqqissaavoq.
- Aningaasaqarnermik – inuiaqatigiit aningaasaqarnerannik innuttaasullu ataasiakkaat aningaasaqarnikkut atugarisaannik - inissiisimatinnata namminiilivinnissap oqaluuserinissaa iluaqutaasinnaanngilaq. Pisseriarujussualertinnata aningaasaqarneq inissinneqarsimasariaqarpoq. Takorluugaq isumaqatigaara, kisianni ullummikkut ulluinnarni ajornartorsiutit aaqqiiviginissaat aallutinngikkutsigu, namminiilivinnissamut tunngavissaq piissavarput, SIKp siulittaasua oqarpoq.
Aviisimi AG-mi atuarnerusinnaavutit. Aviisi uani pissarsiariuk:
