Ussassaarut
Kielsen ajorsarnermi kingorna: Siumut avissaartuutissanngilaq
Siumumi siulittaasumut qinersinerup inernera partiimi avissaartuunnermik kinguneqassanngilaq, siulittaasutut tunuartoq erseqqissaavoq. Unnuup inernera tunngavigalugu qinersisitsinissamik suaarutiginnittoqassanersoq oqaatigerusunngilaa.
Ussassaarut
Ussassaarut
Ussassaarut
Kim Kielsen, nunatsinni partiit annersaanni sapaammi siulittaasumut qinersisoqarnerani unammillertiminut Erik Jensenimut ajorsartoq, erseqqissaavoq, partiimi avissaartuuttoqassanngitsoq.
Siulittaasumummi qinersisoqarnerata inernera naligiiffiungaatsiarpoq. Erik Jensen 39-nit taaneqarpoq, Kim Kielsenilu 32-nit taaneqarluni.
Siulittaasutulli tunuartoq tupaallassimanani qinersinerup kingorna Sermitsiaq.AG-mut oqarpoq.
- Naagga, tamanna aamma ilimagereersimanngilara.
Kielsen partiimut siulittaasutut saqqumilaarpallaarsimanngitsutut ataatsimeersuarnerup nalaani arlalinnit arlaleriaqaluni isornartorsiorneqarpoq.
- Ataatsimuussaagut. Kinaluunniit siulittaasunngoraluarpat. Nunap ineriartortinneqarnera eqqarsaatigalugu tamanna pisussaaffigaarput. Saqqumilaarnerulissaqqaarpunga. Tamanna aamma pisussaaffigaara. Saqqumilaarpallaarsimannginnera oqaatigineqaqattaartuarpoq, Kim Kielsen, Siumumi siulittaasunngorniulluni qineqqusaarutimi saqqummiunnerani ilaatigut oqarpoq.
Ussassaarut
Naalakkersuisuni susoqassava?
Partiimut siulittaasuunak Naalakkersuisut siulittaasuattut ingerlaqqittussanngorputit. Tamanna ilinnut unammillernartuussava?
- Qanoq pisoqassanersoq takoqqaalaariartigu. Tamanna Siumumi oqaluuserissavarput. Soorluttaaq Inatsisartut gruppianni oqaluuserissagipput. Suleqatigiippugut, oqarpoq.
Qinersisitsinissamik suaaruteqarnissat isumaliutigaajuk?
- Tamanna maani oqaluttuarinngisaannassavara. Kisianni tunuliaquttakka soorunami oqaloqatigissavakka.
Qinersinerup inernera partiip iluani avissaartuunnermut qaninnera nassuerutigivat?
- Siumut avissaartuutissanngilaq. Tamanna erseqqissaatigaara. Aamma naak inernera naligiiffiugaluartoq. Siumut ataasiuvoq.