Kielsen malartaaserpoq: Inersimarpasinngitsutut taaginnannga
Inersimarpasinngitsuuneq pineqanngilaq, oqaatsit pillugit oqallinnermi kissaammernartumi Kim Kielsen Naaja Nathanielsenimut oqarpoq
Siumumeersoq Kim Kielsen IA-meersorlu Naaja Nathanielsen ataatsimiititaliami ataatsimiinnermut atatillugu imminnut saassupput.
Siullermik Kim Kielsen ataatsimiinnermit anivoq nalunaarusiaq kalaallisuumut nutserneqarsimanngimmat. Taamaariarmat Naaja Nathanielsenip Kielsenip pissusilersornera inersimarpalunngitsutut taavaa, oqaatsitigut angusaqarusussuseq ujartuutigalugu.
Aturuk "Naajap Kielsen kamaappaa: Meerarpaluttoq"
Atuaruk "Oqaatsinut akerliulluni Siumut anivoq"
Kim Kielsenilli tamanna soqutiginngilaa, taanna SermitsiaqAG-mut oqarpoq.
- Inersimarpalunnginneq allaluunniit pineqanngilaq. Inersimarpalunngitsutut taaginnarsinnaavaanga, kimigiiserutigaarali kalaallit oqaasii nunami maani oqaatsit pingaarnerpaajussasut - taamaattumnillu nalunaarusiat tamarmik, kalaalisuujunngitsut, kalaallisuumut nutserneqassapput.
Naaja Nathanielsenilli suliassamut isummertoqassatillugu ilaannikkut sukkasuumik ingerlatsisoqarnissaanik tunngavilersuutaa Kim Kielsenip paasisinnaavaa.
Nutserisut amerlanerusut, qujanaq
Qallunaatuinnarli saqqummiunneqarneranit allaanerusumik aaqqiissutissaqartariaqarpoq, Kielsen isumaqarpoq.
- Taava avataanit nutserisunik pissarsiortariaqarpoq nutserinerit sukkasuumik peqqullugit. Pissusissamisuunngilaq marluinnik oqaasillit ataasiinnarmik oqaasilinnit siuarsimanerussasut. Taava ataasiinnarmik oqaluttut katataassapput, taanna oqarpoq.
- Eqqaamassavarput aalajangiisartuugatta, taamaattumillu ilisimasat, inunnguuseralugu oqaatsivut atorlugit pissarsiavut, tunuliaqutaralugit aalajangiisinnaassaagut, taanna kimigiiserpoq.