Kigutigissaanermi allannguisoqarnera nalunaarummik malinninngilaq

Peqqinnissaqarfimmi qullersaqarfik peqqissutsimut aqutsisoqarfiup ataaniittoq aalajangerpoq meeqqat akeqanngitsumik bøjlelertinneqartarnerat unitsinneqassasoq.

Tunngavilersuutigineqarpoq kigutilerisut immikkut ilinniarsimasut, kigutilerisut kigutigissaanermilu suliaqartut allat amigaatigineqarnerat.

- Kigutilerisunik immikkut ilinniarsimasunik atorfinitsitsiniarnermut ajornartorsiuteqarnerput nunatsinni tamarmi atuuppoq, Peqqinnissaqarfimmi qullersaqarfik ilisimatitsivoq, taakkua suliap namminersortunut suliakkiunnissaa toqqarsimanngilaat.

Nalunaarut malinneqanngilaq

Nalunaarutilli atuuttut qimerluulaaraanni meeqqat kigutaasa narlorissarnissaannut suliamik tunulliussineq, kigutigissaaneq pillugu namminersornerullutik oqartussat nalunaarutaannik malinninngitsuusoq atuarneqarsinnaavoq.

Namminersornerullutik Oqartussat nalunaarutaat nr. 15 septembarip 13-ani 2006-imeersumi, paragraf 3-mi allassimavoq meeqqat sutigut tamatigut salliunneqassasut.

- Innuttaasut tamarmik aaqqissuussaasumik kigutigissaanermik neqerooruteqarfigineqarnissaannut naammattunik sulisussaqanngippat aningaasassaqartitsisoqaraniluunniit, meeqqanut inuusuttunullu aaqqissuussaasumik kigutigissaasarnissamik neqerooruteqarnissaq pingaartinneqassaaq, nalunaarummi allassimavoq.

Allaqqasoq malillugu kigutigissaanermi sulisussaaleqisoqartillugu aningaasassaaleqisoqartillugulu, meeqqat kigutaasa peqqissusaat allanit tamanit salliutinneqartassaaq.

Akisungaatsiassaaq

Tandlæge Niels Nygaardimi kigutilerisoq bøjlelerisartoq naapertorlugu bøjletaarniarnermi akit 15.000 koruunimiit aallartissinnaasarput. Akilli taaneqartup marloriaataa sinnerlugu aamma akiliisoqarsinnaasarluni.

Nalunaarusiami ersarissarneqarsimavoq meeqqat inuusuttullu ukioq 20-nik ukioqalerfissaq tikillugu akeqanngitsumik aalajangersimasumik akuttussusilimmik kigutileritinnissamut pisinnaatitaaffeqarput. Tamanna aamma atuuppoq inunnut innarluutilinnut.

Kigutigissaanermili neqeroorutit allanngortinneqartussanngussappata, innuttaasut eqimattat allat, tassa inersimasut, taakkuussapput eqqungaasussat.

- Inuit allat najukkami tamatumunnga nukissaqartitsisoqassappat akeqanngitsumik kigutileritinnissamut neqeroorfigineqarsinnaapput, nalunaarummi allassimavoq.

Meeqqallu kigutaasa narlorissarnissaannut bøjlelersuineq qanoq pingaaruteqartiginersoq apeqquserneqassagaluarpat, kigutilerisoq bøjlelerisoq ersarilluinnartumik akivoq:

- Isikkoq piinnarlugu kigutinik narlorissaaniarluni meeqqanut bøjlelersuisoqarneq ajorpoq! Kigutit equngasut kigutinut peqqinnanngillat, inuunerullu pitsaassusaanut innarliisinnaallutik. Qanoq iliuuseqarfigineqanngippata, taava kigutit aamma peqqiinnerulissapput, Tandlæge Niels Nygaardimi kigutilerisoq bøjlelerisartoq, Karen Haarbo-Nygaard oqarpoq.