Kikkut tamarmik Siumut utaqqivaat
Siumup siulersuisuunerisa maanna isummerfigisussanngorpaat partii sorleq naalakkersuisunngortitsiniarluni isumaqatigiinniarfigineqassanersoq
Siumut aamma Partii Inuit nalunaaquttap akunnera ataaseq inulaarlugu ataatsimeeqatigiipput tamatumali kingorna tusagassiorfinnut oqaatigiumasaat killeqartorujussuupput. Taamaammat suut oqaluuserisimaneraat aamma isumaqatigiinniaqqissamaarnersut suli nalunarpoq.
- Oqaaseqarsinnaanngilanga. Maanna Siumukkut isummerfigissavaat isumaqatigiinniarnerit ingerlaqqinnissaat, Partii Inuit siulittaasuat Nikku Olsen ataatsimiinnerup kingorna oqarpoq.
Siumup siulittaasua Aleqa Hammond Partii Inuit ataatsimeeqatiginerisa kingorna aamma saqqummiussaqarpianngilaq.
- Maanna Siumup siulersuisuuneri ataatsimeeqatigilerpakka. Isumaqatigiinnerit ingerlariaqqinnissaat pillugu ullumi tusagassiortunik katersortitsiumaarpunga, Aleqa Hammond oqarpoq.
Tusagassiortunik katersortitsineq tallimap qeqqa pissaaq. Saqqummiunneqartut pillugit Sermitsiaq.AG kingusinnerusukkut saqqummiussiumaarpoq.