Kilisaammi ikiaroornartoq nassaarineqartoq: Danmarkimi 4 kiilu maannalu Savalimmiuni aamma 5 kiilu
Polar Seafoodip kilisaataa Polar Nataarnaq ullualuit matuma siorna Danmarkimi nalinginnaasumik misissuiffigineqarnermini ikiaroornartumik 4 kiilumik nassaarfigineqareerluni Savalimmiuni nassaarfigineqaqqinnermigut unitsinneqarpoq.
Polar Seafoodip kilisaataa Polar Nataarnaq Danmarkimi nalinginnaasumik misissuiffigineqarnermini hashimik 4 kiilumik sisamanngornermi nassaarfigineqareerluni Kalaallit Nunaata tungaanut ingerlaqqinnissamut akuerineqarpoq. Kilisaat aqqutaani Torshavnimi unillatsiarpoq akitsuuserisunillu misissuiffigineqaqqilluni.
Savalimmiuni politiit misissuinerminni kilisaammik hashimik suli allamik 5 kiilumik sapaammi nassaarput. Taama Savalimmiuni politiini unnerluussisussaatitaasut pisortaat, Katrin Thorsvig Hansen, Sermitsiaq.AG-mut paasissutissiivoq.
Danmarkimi politiit hashimut 4 kiilumut kikkut akisussaanerat aalajangerneqarsinnaasimanngikkallarpoq, Savalimmiunili politiit suliaminnik naammassinnereersimallutik.
- Paasiniaaneq sivikitsumik ingerlanneqareersorlu taassuma (haship 5 kiilup, aaqq.) kimit pigineqarunarnera paasineqarsinnaanngorpoq. Pineqartoq sapaammi unnukkut tigusarineqarpoq, pisuunerminillu nassuerutiginnilluni, unnerluussisut pisortaat oqaluttuarpoq.
Danmarkimi nassaaq miserratigineqartoq
Kalaaleq inuttaq ataasinngornermi tunngaviusumik inatsisit naapertorlugit sassartinneqartoq pineqarpoq. Angutip pisuunini nassuerutigisimammagu suliaq ingerlaannaq aalajangiivigineqarpoq angullu qaammatini qulini pineqaatissinneqarsimasunut inissiisarfimmiittussanngorlugu pineqaatissinneqarluni.
Angut tamatuma kingorna iperagaavoq, Kalaallit Nunaannilu inuit nalunaarsorsimaffianni najugaqarfigisamini pinerluuteqarsimasunik isumaginnittoqarfimmit inissiisarfimmiinnissamut aggersarneqarumaarluni, Katrin Thorsvig Hansen paasissutissiivoq.
Inuk Savalimmiuni 5 kiilunut pineqaatissinneqartoq Danmarkimi nassaarineqartumut ilisimasaqannginnerarpoq.
- Apeqqutaavoq pisuussuteqannginneq pisuussuteqarnerluunniit uppernarsarneqarsinnaassanersoq, nassaarineqartoq nassaarfimmi siullermi toqqortarineqarsimanngimmat. Inuk unnerluutigisarput soorunami Danmarkip nassaap aappaanut apersorsimavarput, kisianni taanna suliamut naammassisatsinnut ilanngunneqanngilaq.