Killilersuutit illoqarfinni pingasuni atuutsinneqassapput
Sisimiuni, Upernavimmi Aasiannilu killilersuutit atuuttut 31. oktober tungaanut atuuttussanngorlugit sivitsorneqarput. Nunap sinnerani killilersuutit atorunnaassapput.
Sisimiuni tunillatsissimasut nutaat arfineq-marluk ullumi paasineqarsimasut nalunaarutigineqarpoq. Taakku utoqqaat illuannut meeqqerivinnullu attuumassuteqartut, nunatta nakorsaanerata ilisimatitsissutigaa.
Nuummi tunillatsissimasut nutaat tallimat ualip ingerlanerani paasineqarsimasut aamma nalunaarutigineqarpoq.
Pisortat suliffeqarfiutaanni, pisortat angallassiviini pisiniarfinnilu qanermut assiaquteqarnissamut piumasaqaatit, katersuussinnaasut amerlanerpaamik neriniartarfinnullu assigisaannullu isernissamut akiuussutissamik kapitissimanermut uppernarsaateqarnissamut piumasaqaatit Sisimiuni, Aasianni Upernavimmilu sapaatit akunnerni pingasuni suli atuuttussanngortinneqarput.
Inuit katerissinnaanerannut killilersuut illoqarfinni pingasuni pineqartuni septemberip 30-anut sivitsorneqarpoq.
Sisimiuni maanna tunillatsissimasut 60-iupput. Aasianni sisamat aamma Upernavimmi aqqaneq-marluk tunillatsissimasutut nalunaarsorneqarsimapput.
Upernavimmi, Aasianni Sisimiuni pisortat angallassissutaanni, soorlu timmisartumi, bussini Sarfaq Ittummiluunniit ilaanissamut akiuussutissamik kapitissimanissaq suli piumasaqaataassaaq.
Nalunaarut 31. oktoberip tungaanut atuuttussanngorlugu sivitsorneqarpoq. Peqqissutsimut Naalakkersuisup, Kirsten Fenckerip ilisimatitsissutigaa pissutsit allanngorneri malillugit nalunaarut Sisimiunut, Aasiannut Upernavimmullu atuuttoq illoqarfinnut allanut aamma atuuttalersinnaasassasoq.
- Sisimiuniit, Upernavimmiit Aasianniillu Kalaallit Nunaanni sumiiffinnut allanut angalasut akiuussutissamik kapitissimanngikkunik ulluni tallimani angerlarsimaannarallarnissamik piumasaqarfigineqarput, ilisimatitsissutigineqarpoq.
Illoqarfiit allat killilersorneqarunnaarput
Katersuunnissamut killilersuutit, akiuussutissalertissimanermut tunillatsissimannginnermulluunniit uppernarsaateqaqqaarnissaq nunap sinnerani pingasunngornermiit atuukkunnaassapput.
Nunatsinnut tikittunut maleruaqqusat tamarmik suli atuupput. Tamanna isumaqarpoq nunatsinnut angalannginnermi tunillatsissimannginnermut misissuut uppernarsaat 48 tiiminit nutaannginnerunngitsoq takutinneqartassaaq aamma Sumut immersorneqarsimasassaaq. Nunatsinni najugaqanngitsut naammassillutik akiuussutissalersimagunik aatsaat tikissinnaapput.
Tunu ammarnerussaaq
Kulusummiit Reykjavikkimut silaannakkut aqqutip ammarnissaanut Naalakkersuisut aamma periarfissiillutik ilisimatitsipput.
Reykjavikkip Kulusuullu akornanni silaannakkut angallassinerit sapaatip akunneranut pingasut, angalasut 180-it tikillugit angallanneqarsinnaasunngorlugit ammaanniarneqarpoq. Islandimi tunillatsissimasut nutaat 62-it ippassaaq paasineqarsimasut nalunaarutigineqarsimavoq.