Kim K.: Johan Lund Olsen taasinermi peqquserluppoq
Ineqarnermut Attaveqarnermullu Naalakkersuisoq Kim Kielsen maanna saqqummerluni oqarpoq, Johan Lund Olsen taasinermi atortunik peqquserluuteqarsimasoq.
Inatsisartunut ilaasortaq alla aamma maanna taasinermi atortunik peqquserluuteqarsimasutut unnerluutigineqarpoq, toortakkamik kukkusumik toorsisimaneragaalluni. Pinearpoq Johan Lund Olsen Inuit Ataqatigiinneersoq. Tamanna naalakkersuisunut ilaasortap Kim Kielsenip Siumumeersup oqaatigaa, oqaatigisani uppernarsarsinnaallugit, knr.gl allappoq.
Kim Kielsenip aamma Inatsisartut Siulittaasoqarfiat isoraa, taanna naalakkersuisunut ilaasortap paasinninnera naapertorlugu taasinerni peqquserluttarsimanerit pillugit suliaq ajornanngippallaamik suliarisimammasuk.
- Suliaq imatut ittoq demokratiip tunngaviusumik malittarisassaanut unioqqutitsineruvoq ilungersunartoq, tassami erseqqilluinnartumik allassimavoq inatsisartuni ilaasortaq kinaluunniit innuttaasunit qinigaasimasoq ataasiinnarmik taasisinnaasoq, taamak naalakkersuisunut ilaasortaq Kim Kielsen Radioaviisimut oqarpoq.
Taassuma isumaa naapertorlugu suliaq manna politiit suliassaraat.
Inatsisartunut ilaasortaq Johan Lund Olsen ullumi radioaviisimut oqarpoq, nammineq pisuunani.
- Naalakkersuisunut ilaasortaq Kim Kielsen pisuutitsiniutini tamanut saqqummiutereertinnagu suliaq manna oqaaseqarfiginianngilara, Johan Lund Olsen oqarpoq.