Kim Kielsen: Aalisarnermut inatsisissamut tusarniaaneq sivitsorneqassanngilaq
Naak aalisartut, politikerit kattuffiillu aalisarnermut inatsisissamut tusarniutip sivitsorneqarnissaa kissaatigigaluaraat, Aalisarnermut Piniarnermullu Naalakkersuisup ullorititaq allanngortikkusunngilaa.
Aalisarnermut inatsisissamut tusarniaanermi killiliussaq januaarip 24-anut killeqarpoq. Aamma allanngortinneqassanngilaq, taama Naalakkersuisut isumaat allanngortitassaanani inissisimavoq. Aalisartut, sumiiffimmi politikerit kattuffiillu inatsisissaq qanoq sunniuteqassanerspq tamakkiisumik ilisimanngimmassuk kinguartinnissaa kissaatigisaraluarpaat.
Tusarniaaneq sivisooq
Aalisarnermut inatsisissaq Inatsisartut upernaakkut ataatsimiinneranni suliarineqartussaammat tusarniaaneq sivitsorneqassanngitsoq, Aalisarnermut Piniarnermullu Naalakkersuisup tusagassiuutitigut allalluni peqqutaatippaa. Tusarniaanerit nalinginnaasumik sapaatip akunnerini sisamaniu pisaraluarpoq, unali tusarniutigineqartoq sapaatip akunnerini arfineq-pingasunik sivisussuseqarpoq. Nalinginnaanngitsumik.
Ilanngullugu tusagassiuutitigut nalunaarummi Kim Kielsen allappoq kattuffiit inatsisissatut siunnersuut sioqqullugu misissueqqissaarnermi oqallinnernilu annertuumik akuusut.
- Assersuutigalugu Sulisitsisut Aalisarneq pillugu Ataatsimiititaliarsuarmi 2019 sioqqullugu ilaasortaatitaqarput. Tassani immikkoortut amerlanersaat siunnersuummi maannakkut ilanngunneqartut misissorneqaqqissaarneqarput oqallisigineqarlutillu.
Ilanngullugulu oqaatigalugu ataatsimiititaliarsuup isumaliutissiissutaa septembarimi 2021-mi saqqummiunneqarmat, tassa ukiut marluk sinnerlugit matuma siorna, soqutigisaqartut tamarmik ataatsimiititaliarsuup sulinerani tamassumalu kingorna suliniutaasinnaasunik namminneq naatsorsuinissamut periarfissaqarsimasut.
- Naalakkersuisut tamassuma kingorna aalisarneq pillugu inatsisissaq nutaaq pillugu Ilulissani Nuummilu aalisarneq pillugu isumasioqatigiissitsipput, nunami tamarmi innuttaasunik ataatsimiititsillutik soqutigisaqartunillu tamanik ataatsimeeqateqartarput. Isummat tassunga atatillugu saqqummiunneqartut inatsisissatut siunnersuutip suliarinerani aamma ilanngunneqartarlutik.
Naggasiivorlu.
- Aalisakkanik pisuussutit inuiaqatigiit pigaat, siunnersuullu taamaammat inuiaqatigiinni tamanut tusarniutigineqarpoq taamaalilluni akerliussutaasinnaasut siunnersuutillu siunnersuummik pitsannguisinnaasut ilanngunneqarsinnaapput. Taamaaliornikkut inaarutaasumik siunnersuummi siunertap annertunerpaamik eqqortinneqarnissaa qulakkiissavarput, tassa ataatsimut pisuussutitsinnik pitsaanerpaamik aqutsinermut sinaakkusiinissaq, Kim Kielsen tusagassiuutitigut nalunaarummini taama naggasiivoq.