qinersinerup kingorna
Kim Kielsen: Anguniakkagut ersarippallaarsimanngillat
Partii ersarinnerusumik innuttaasunut paasititsiniaanernik ingerlattariaqartut, Siumup siulittaasua Kim Kielsen oqarpoq
Kalaallit Nunaanni partiit annersaat Siumut kinguariarpoq.
Marlunngormat kommuninut qinersisoqarnerani partii nuna tamakkerlugu malunnaatilimmik kinguariarpoq.
- Innuttaasut qinersinermikkut inissiinerat ataqqillugu sineriapput tamakkerlugu anguniakkavut ingerlateqqissavagut aamma partiit allat suleqatigalugit, Siumumi siulittaasoq Kim Kielsen oqarpoq.
Nuummi malunnartumik kinguariarneq
Nunatsinni illoqarfiit pingaarnersaat, Nuuk, partiip qinersisartunit annaasaqarfigisimasaa taakkartorpaa.
- Immikkullu taasariaqarpoq Nuummi - Nunatsinni illoqarfiit annersaanni malunnaatilimmik kinguariarnitta takutippaa tassani partiitta anguniagai pillugit ersarinnerusariaqartugut paasisitsiniaanerillu ersarissumik ingerlattariaqarivut, taanna tusagassiuutinut nalunaarummi oqarpoq.
- Siumup nunatsinni partiit annersaatut inisseqqinnera tikkuussivoq nunatsinni tamarmi naligiinnerusumik ineriartortitsiniarnerput aammalu innuttaasut sullinneqarnerannik pitsaanerulersitsiniarnerput tapersersorluarneqartut, tamannalu ilungersuutigalugu ingerlateqqissavarput, Kim Kielsen oqarpoq.