Kim Kielsen: Issittoq angerlarsimaffigaarput
Naalakkersuisut Siulittaasuata Reykjavikimi Artic Circle Assemblyqartoqarnerani oqalugiarami erseqqissaatigaa, nunat issittumiittut suleqatigiinnerunissaat niueqatigiinnerunissaallu pisariaqartoq
Naalakkersuisut Siulittaasuat Kim Kielsen (S) Arctic Circle Assembly ippassaq Reykjavikip operartarfiani, Harpa, ammaanersiorneqarmat pingaarnertut oqalugiartut ilagivaat.
Tupinnanngitsumik Kalaallit Nunaata nunanit tamalaanit soqutigineqariartuinnarnera oqalugiarnerani qitiutinneqarpoq, periarfissarlu atorlugu Issittumi suleqatigiinnerunissaq aamma Kalaallit Nunaata Issittumi qitiusutut inissisimanera erseqqissaatigaa.
- Issittoq Kalaallit Nunaallu avissaartinneqarsinnaanngillat – issittoq najugaqarfigaarput angerlarsimaffigalugulu, oqalugiaatini aallarnerlugu taamatut oqarpoq.
Issittumi Siunnersuisoqatigiinni aalajangersimasumik peqataasarnissaq
Naalagaaffeqatigiinni Kalaallit Nunaata namminersulivinnissamik anguniagaqarneranik paasinnilluni suleqatigiittoqarnera ataqqeqatigiittoqarneralu eqqaavai.
Kim Kielsenip tassunga atatillugu erseqqissaatigaa, Naalagaaffeqatigiinnerup iluani issittoq pillugu eqqartueqatigiittoqaraangat, tamatigorluinnaq Nunatta peqataatinneqartarnissaa, tamatumunnga atatillugu Kalaallit Nunaannit ukiorpassuarni piumasaqaataasartoq oqaatigeqqippaa.
- Pissusissamisoortutut uagut isigaarput, Kalaallit Nunaata Issittumi Siunnersuisooqatigiinni Naalagaaffiup aallartitaattut issiavik tigummissagaa.
Nunatta pisiarineqarnissaanik oqariartuuteqarneq tupinnartoq
Taamaalilluni apeqqut inuppassuarnit soqutigineqarluannguatsiartoq tikippaa.
- Nunatta inissisimanera nunarsuarmi pissaanilissuit marluk qiterluinnaanni inissisimavoq, tamannalu maluginngitsuusaaginnarsinnaanngilarput.
- Ukiuni kingullerni Kalaallit Nunaata avataanit soqutigineqarnera aammalu ussatigineqarnerujussua arajutsisimanngilarput. Soorlu aasaq nunatta pisiariumaneqarnera nutaarsiassatigut nunarsuarmi tamani aalassassutaaqisumik eqqartoqarneqartoq annertuumik malugigipput.
- Nunatta pisiariniarneqarnissaanik oqariartuuteqarneq uatsinnut tupigusuutiginarpoq, nunamimmi pisinissaq kulturitsinnut naapertuutinngimmat – Nunarput qangaaniilli inuisa killeqarfeqaratik ingerlaarfigisarsimavaat ullutsinnilu allaat nunaminertanik pisisoqarsinnaanani – taamaallaat inuisa nunaminertat attartorsinnaasarpaat.
Periarfissat
Kim Kielsenip taakku oqaatigereerlugit Kalaallit Nunaata soqutigineqaleriartuinnarnerani periarfissaasinnaasut tikippai. Tassunga atatillugu nutaanik attaveqaasesuisimaneq, niueqatigiinnerup ineriartortinneqarnissaanut pisariaqartinneqartut oqaluttuarai. Aamma taassuma isumaa malillugu, imaatigut kabeli periarfissanik nutaanik pilersitsisoq eqqaavaa. Aalisarnerup iluani ineriartortoqartoq ukiunilu kingullerni kilisaatinik nutaanik pissarsisoqartartoq.
Aammali silap pissusaata allanngoriartorneranut imanilu uumassusilinnut tunngatillugit suleqatigiinnerusoqarnissaanik pisariaqartitsisoqartoq oqaatigaa.
Kim Kielsenip Kalaallit Nunaata akisussaassuseqartumik tatiginartumillu suleqatgineqarsinnaannera oqaatigalugu nunat issittumiittut suleqatigiinnerunissaannik kaammattorpai.
- Ukiuni kingullerni Issittoq minnerunngitsumillu Kalaallit Nunaat nunarsuarmioqatigiinniit isigineqaleraluttuinnarpoq. Uanga oqarusuppunga: Qujanaqaaq soqutiginninneq annertusiartormat ilisimasallu annertusiartormata. Nuannaarutigaara silap allanngoriartornera ataatsimut peqatigiilluta iliuuseqarfigisinnaassagatsigu. Minnerunngitsumillu nuannaarutigaara Kalaallit Nunaata nammineq ineriartornera nunat allat suleqatigalugit siuarsarsinnaagatsigu – niuernikkut, suliffeqarnikkut ilinniartitaanikkut ilisimatusarnikkullu, oqalugiarnermini inerniliinera taamatut nipeqartoq, uani tamakkerlugu atuarsinnaavat.