Kim Kielsen pisortap tullersortaanik nutaamik toqqaavoq
Naalakkersuisut aalajangerpaat Simigaq Broberg novembarip aallaqqaataaniit Naalakkersuisut Siulittaasuata Naalakkersuisoqarfiani pisortap tullersortaatut atorfinitsinneqassasoq.
Simigaq Broberg novembarip aallaqqaataaniit Naalakkersuisut Siulittaasuata Naalakkersuisoqarfiata allatseqarfiani pisortanngoruni Naalakkersuisut atorfilittaasa qullersaannut tullersortinngussaaq.
Simigaq Broberg allaffissornikkut aqutsinermut tunngasunik Ilisimatusarfimmi ilinniagaqartoq ukiuni kingullerni sisamani Kommuneqarfik Sermersuup allatseqarfiani pisortaavoq. Maannalu Naalakkersuisut Siulittaasuata Naalakkersuisoqarfiani sulilernissaminut qilanaarpoq.
- Manna tikillugu kommunimi sulineq misilittagaqarfigaara, atorfittaassanni nuna tamakkerlugu sullissilernissara assut pilerinartillugulu qilanaaraara. Nunatsinni siunissami ineriartornermut tikkuussisut qanimut suleqataaffigilernissaat qilanaareqaara, Naalakkersuisut tallimanngornermi ualikkut tusagassiuutinut nalunaarummi nassiussaanni, Simigaq Broberg taama oqarpoq.
Simigaq Brobergip atorfinittussanngorneratigut Naalakkersuisut Siulittaasuata Naalakkersuisoqarfiani aqutsisutut atorfiit tamakkerlutik aalajangersimasumik inuttaqalissapput, tamannalu naalakkersuisoqarfiup pisortaata Hans-Peder Barlach Christensenip nuannaarutigaa:
- Naalakkersuisoqarfimmi pisortatut atorfiit tamakkerlutik aalajangersimasumik atorfilinnik inuttaqalersussanngormata suleriaatsinik nutarterinerit aallarnisartussanngorpagut, taamaattumik Simigaq Brobergip naalakkersuisoqarfimmi atorfigiligassaanut tikilluaqqusinnaagakku nuannaarutigaara, Hans-Peder Barlach Christensen oqarpoq.