Kim Kielsen: Politikkikkut killiffik atorsinnaanngilaq

- Killiffik sapaatip akunnerini kingulliit marluk pingasulli akornanni eqqarsaatigisimavara. Isumaqarpunga massakkut qinersisoqarpat isumatusaarnerussasoq, taamaasiornikkummi upernaakkut ataatsimiinnissaq asuli ataatsimiiffiussanngilaq, Kim Kielsen Sermitsiaq.AG-mut nassuiaavoq.

Rent bord

- Taamaasilluni torersaasoqassaaq, qinigaasullu nutaat aningaasaqarnermut inatsisissamut sunniuteqaqataasinnaassallutik. Politikkikkut taamaaliornissaq tulluarnerpaasoraara, Kim Kielsen erseqqissaavoq.

Qinersinissap ullussaata maannamut qularutigineqarneranut pissutaa tassaavoq, piffissaq sorliussanersoq Inatsisartunit amerlanerussuteqartunit aalajangerneqartussaanera. Naalakkersuisulli tatiginnikkunnaarnermik pissuteqartumik ikinnerussuteqalersimasuungaluarpata Kim Kielsen nammineerluni qinersinissamut ulluliisimasinnaassangaluarpoq. Qinigaaffik tamakkerlugu atorsimasuungaluaruniuk aamma taamaaliorsimasinnaangaluarpoq.

Inatsisissatut siunnersuutit taamaatinneqartut

Massakkut inatsisissatut siunnersuutit suliarineqartumi tamarmik taamaatinneqarput. Tamanna aalisarnermut inatsissatut siunnersuut Inatsisartuni siullermeerneqarsimasumut, aamma atuuppoq. Tassa inatsisissatut siunnersuutaasimangaluit naleqqussarlugit allanngortinneqarnianngippata tamarmik nassiunneqaqqittariaqarput.

Kim Kielsenip oqaluttuaraa, tusagassiuuteqarfinnik aggersaanermi kingorna partiit naalakkersuisooqataasut paasitissimallugit. Tusagassiorfiit nalunaaquttaq ataatsimik periarfissalerlugit aggersarneqarput.

Nassuiaat

Ullumikkut naalakkersuisoqatini kallerissimannginneri pillugit ima nassuiaateqarpoq:

- Inuiaqatigiit Naalakkersuisut siulittaasuannit taama nalunaarfigineqarnissaat pingaaruteqarpoq, Kim Kielsen erseqqissaavoq.