Kina pisinnaava? Kanukoka!
Kommunit Kattuffiat ingerlaluarluni ukiumut nutaamut ikaassaaq.
Kommunit 2009-mi jannuaarip aallaqqaataani kattunnissaat - kommunit maannakkut 18-iusut kommunerujussuarnut 4-nut kattunneqartussaasut - aamma kommunit kattuffiannut Kanukoka-mut pingaarutilimmik pisoqarfiusussaavoq.
Taamaattumik aamma Kanukokap siunissaa arfininngormat ullaap-tungaani Nuummi kommunalbestyrelsep immikkut ittumik ataatsimiinnerani oqaluuserineqarpoq.
Kanukokamiit aniniarneq kattuffiup malittarisassai naapertorlugit ukiup naanerani ukiumik ataatsimik sioqqutsilluni nalunaaruteqarnikkut pisussaavoq. Allatut oqaatigalugu: Nuup Kommunea Kanukoka-miit 2009-mi jannuaarip 1-iani aniniaruni tamanna kingusinnerpaamik decembarip 31-iani nalunaarutigissavaa.
Kommuneni tallimaasuni 2009-mi jannuaarip 1-iani sermersuaq ikaarlugu Kangia/Kitaa kommuninngortussamiittuni kommunaldirektørit inassutigisimavaat, Ivittuut, Paamiut, Nuuk, Ammassalik aamma Ittoqqortoormiit kattuffimmiit anissasut, taamaalilluni kommunerujussuaq 2009-mi ullormit siullermiit ilaasortaajunnaarsinnaassammat.
Inassut taanna kommunalbestyrelsep itigartilluinnarpaa.
– Kommunerujussuit sisamat namminersornerusuniit ingerlatsivinnik arlalissuarnik tigusisussaasut pilersinneqarnerpiaannut atatillugu kattuffimmiit siunnersorneqarnissamik ilitsersorneqarnissamillu aallersinnaanissarput pingaarutilerujussuuvoq, Nuummi Inuit Ataqatigiit ilaasortaatitaasa siulittaasuat Ove Karl Berthelsen sermitsiaq.gl-imut oqarpoq.
Kanukokap septembarimi sisamaannarnik ilaasortaqarluni ataatsimeersuarnissaani siunissami qanoq inissisimanissani eqqartortussaavaa, ataatsimeersuarnermi tassani aamma siulittaasoq siulersuisunilu ilaasortat nutaat qinerneqartussaaput.
Ataatsimiinnermi tassani peqataasussat tassaassapput ataatsimiitsitaliani ikaarsaariarnermi atuuttussani aallartitat, taakku apriilip 8-ni qinerneqariarlutik maajip 1-iani sulilissapput.