Kinderimit nioqqutissat salmonellaqarsinnaasut
Pisiffiup sukkulaat nioqqutissat Kinderimeersut arlallit Danmarkimi inuussutissanut aqutsisoqarfiup salmonellaqarsinnaanerinik mianersoqqussutigisai utertippai.
Nunani allani tunisassiortup eqqiluisaarnikkut ajornartorsiuteqarnerata kingunerisaanik nioqqutissani salmonellaqarsinnaavoq. Danmarkimi inuussutissanut aqutsisoqarfik taama allappoq.
Salmonellalinnik nerisimagaanni ersiutit tassaapput timminneq, naarlunneq, kissarneqarneq, niaqorlunneq immaqalu meriannguneq meriarnerlu. Nappaat ulluni arlaqanngitsunit sapaatip-akunnerini arlalinni napparsimassutaasinnaavoq. Nappaat peruluutigineqalerpat imaluunniit sivisuumik napparsimassutigineqarpat, nakorsaq imaluunniit peqqinnissaqarfik attaveqarfigisinnaavat.
Piffissap ingerlanerani sukkulaani nioqqutissani salmonellap bakteeriaqarneranik pissuteqartunik nappaalasoqartarnera allaaserineqartarpoq. Salmonellami bakteerissat nalinginnaasumik uumasut inalugaanniittarput, tassanngaanniillu – ass. naggorissaatit imaluunniit imeq mingutsinneqarsimasoq aqqutigalugu – nerisassanut nioqqutissanut ass. Kakaoinut pisinnaapput, kingornalu sukkulaanik nioqqutissiornermut atorneqarlutik.
Sukkulaani ulorianarnerusoq
Salmonella sukkulaaniittoq ulorianarneruvoq, sukkulaanimi annertuumik orsoqarnera salmonellap bakteeriaannut aqajaqqup isseratigoorneranut illersuisarmat. Tamatuma peqatigisaanik bakteerissat aqajaqqup isseratigut ajoquteqaratik ingerlaarsinnaanerulertarput, tamatumalu kingorna aqajaqqukkut aseruutilersitsisinnaapput. Taamaattoqarnera pingaartumik sukkulaat nioqqutissat meeqqanut toqqaannartumik nittarsaanneqartut pineqarneranni ilungersunarluinnarpoq, Danmarkimi inuussutissanut aqutsisoqarfik taama allappoq.
Sermitsiaq.AG-p nioqqutissat Brugsenip nioqqutissaatiginerai paasiniarpaa.
Atuisunut siunnersuutit:
Inuussutissanut aqutsisoqarfiup nioqqutissat atuisut pisiniarfinnut pisiarineqarfiinut utertissagaat innersuussutigaa, imaluunniit igissagaat.