Kinguaassiutitigut innimiilliorneq immikkoortitsinerlu pillugit maalaarutinik Ilisimatusarfik tigusaqartarpoq
Ilisimatusarfik 2021-miilli ilinniartunit aamma sulisunit maalaarutinik arlalinnik tigusaqartarpoq, taakku ilaatigut nakkarsaanermut immikkoortitsinermullu tunngapput.
Ilisimatusarfimmi 2021-miilli ilinniartunit aamma sulisunit maalaaruteqarnerit arlallit suliarineqarsimapput.
Ilisimatusarfiup peqqussuteqarfigineqarsimaneranik Sermitsiaq.AG-p allagaatinik takunnikkumanermigut pissarsiarisaani tamanna takuneqarsinnaavoq, Sullivinnik Nakkutilliisoqarfik naapertorlugu APV-mik (sullivimmik nalilersuinermut) piumasaqaatinik nutarterisimanngimmat.
2022-miinnaq immikkoortortaqarfimmit ataatsimit sulisunik marlunnik soraarsitsinernik suliaqartoqarsimasoq, tusagassiorfiup matuma saqqummiuppaa.
2021-miilli suliat katillutik aqqaniliupput. Ilaatigut sulisut pingasut tamarmik immikkut suleqatertik imaluunniit aqutsisoq pillugu maalaaruteqarsimanerinut tunngavoq. Suliaq ataaseq nakkarsaanermut tunngavoq.
Ilinniartitsisut arlallit maalaarutigineqartut
Ilinniartup ataatsip ilinniartitsisoq kinguaassiutitigut innimiilliorsimaneranik maalaaruteqartoq, ilinniartoq alla sulisoq pillugu immikkoortitsisimasutut maalaarutigaa.
Aammattaaq avataanit ilinniartitsiartortoq pillugu, immikkut oqaaseqarneq aamma karakteerit pillugit kiisalu attaveqaqatigiinnermi suleqatigiinnermilu ajornartorsiutit pillugit maalaaruteqartoqarpoq.
Kingulleq taakkartorneqartoq suliaq ingerlavoq, ilinniartuniillu arlalinnit ilinniartitsisut arlallit maalaarutigineqarput. Maalaarutit sinneri sumut tunnganersut atuarneqarsinnaanngilaq.
- Suliffeqarfinnut allanut sanilliullugit allaanerunersoq naluara, Ilisimatusarfimmi rektori, Gitte Adler Reimer, 2021-miilli maalaarutit annertussusaat pillugit oqaaseqarnermini oqarpoq.
Sulisunut ilinniartunullu najoqqutassat
Gitte Adler Reimer sulianut aalajangersimasunut oqaaseqarsinnaanngilaq. Illuanik suliat assersuutigalugu kinguaassiutitigut innimiilliornermut tunngasunut sukkasuumik pimoorussillunilu qisuariartoqartarnera oqaatigaa.
Ilisimatusarfik ilinniartut sulisullu atugaannik isumaginninnermut naammaginartumik iliuuseqarsimanersoq apeqqummut, rektori ima akissuteqarpoq:
- Taamaattoqartoq isumaqarpunga. Maluginiagaqarpugut, tamarmillu ikiorneqarnissamik pisariaqartitsisut ikiorneqarput, taanna oqarpoq.
2017-imilu rektorinngornerminit suliniutit arlallit suliarineqarsimasut nangilluni oqaatigaa.
- Sulisunut ilinniartunullu maleruagassanik assigiinngitsunik politikkinik suliaqarnikuuvugut, taakku ilinniarfeqarfiit tamarmik maluginiassagaat qinnuiginnippugut. Kinguaassiutitigut innimiilliorneq, immikkoortitsineq aamma nakuuserneq allallu akuersaarneqarsinnaanngitsut, tassani ersarissumik allassimapput.
Oqaloqatiginninnissamut aggersaasartut
Assersuutigalugu ilinniartunut kinguaassiutitigut innimiilliorneq pillugu suliani aqutsisut qanoq suleriuseqartarnersut aperineqarami, Gitte Adler Reimer akivoq:
- Oqaloqatiginninnissamut aggersaasarpugut, qanorlu pisoqarsimanera qulaajartarparput. Ingerlaanneq iliuuseqartarpugut, oqaatigeriikkattullu pimoorussilluta suliarisarpagut.
Soraarsitsinermik kinguneqartitsisoqarnikuua?
- Sulisumut tunngammat oqaaseqarfigisinnaanngilluinnarpara.
Ilisimatusarfiup 2022-mut ukiumoortumik nalunaarusiaani Ilisimatusarfik 68-inik immikkoortortaqarfinnut sisamanut agguarneqarsimasunik aamma ataatsimut suliassaqarfinni aqutsisuni aamma TAP-mi (teknikikkut allaffissornikkullu suliaqartut) sulisut 30-upput.