pitsaaliuineq
Kinguaassiutitigut kanngutsaatsuliortarnerit Qeqqata Kommunianit unitsinniarneqarpoq
Kinguaassiutitigut kanngutsaatsuliortarnerit unitsinniarlugit pisiniarfinni sulisut taxartartullu suleqatigineqarsinnaasut innuttaasut ataatsimiisinneqarneranni innuttaasumit siunnersuutigineqarpoq
Qeqqata Kommunia meeqqanut atugarissaannginnerusunut suliassalerujussuaq MIO-p nalunaarutaani ukioq kingullermi saqqummersumi atuarneqarsinnaavoq.
Meeqqat illersuisuat innersuussaqareerneratigut kommuni suleqatigiissitanik arfinilinnik pilersitsivoq.
Ajornartorsiut pillugu suleqatigiissitat ilaat innuttaasunik ataatsimiisitsipput ataasinngormat.
- Kinguaassiutitigut kanngutsaatsuliortarnerit Qeqqata Kommunianit unitsinniarpagut, uagut inersimasutut suliassarput annerpaaq tassaavoq, meeqqanik illersuinissaq, borgmesteri Malik Berthelsen ammaanermini oqarpoq.
Pisiniartitsisut taxartartullu
Innuttaasut 40-t peqataapput, kanngutsaatsuliortarnerillu qanoq pinaveersaartissinnaanerinut suleqatigiissitani suleqataallutik
- Sparimi Brugsenimilu sulisut siunnersuutigaat, pisiniartitsisut taxartartullu meeqqanik sumiginnaasimasunik oqaloqateqarnissamik ilinniartinneqarsinnaasut. Aamma susassaqartunut qanoq saaffiginnissinnaanersut ilinniartinneqartariaqartut siunnersuutigineqarluni, Malik Berthelsen Sermitsiaq.AG-mut oqarpoq.
Meeqqat Sparip Brugsenillu eqqaani takussaasartut Malik Berthelsenip oqaatigaa. Tassani pisiniartitsisut taxartartullu takusarpaat.
Unnerluussisussaatitaaneq
Meeqqat toqqissisimananngitsumik atugaqartinneqarnerini, assersuutigalugu affarlit fiistappata imerlutillu, namminerlu nalunagu meerartaqartut, taava innuttaasut pasitsaassaminnik unnerluussisussaatitaasut erseqqissaatigineqarpoq.
Siunnersuutigineqartut tamarmik kommunimit katersorneqarput, suliallu akimorlugit suleqatigiissitanik suliamik ingerlatitseqqissallutik, suliniutillu tamakku 2018-imi februaarip 21-ani kommunalbestyrelsip "Qeqqata Kommuniani meeqqat inuunerissut"-mik sammisaqarnerini saqqummiunneqassallutik.