Kinguaassiuutitigut atornerluisoqarsimaneranik nalunaarusiaq naalakkersuisup qisuariarfigaa
Nalunaarusiami allassimavoq innarluutilinnut ulloq unnuarlu neqeroorutigineqartartuni kinguaassiuutitigut atoqatigiinnermut tunngatillugu aamma kinguaassiuutitigut atornerluisarneq pinaveersaartinniarlugu iliuuseqartoqartariaqartoq. Naalakkersuisut tamanna nassuerutigaat, iliuusissamullu pilersaarutissami suliniutinik nutaanik ilanngussillutik.
Inunnut innarluutilinnut ulloq unnuarlu najukkatut neqeroorutigineqartartuni atukkat nalinginnaasut aamma kinguaassiuutitigut atornerluinerit pillugit nalunaarusiami saqqummersut Naalakkersuisut tupaallaatigaat.
Meeqqanut, Inuusuttunut, Ilinniartitaanermut, Kultureqarnermut, Timersornermut Ilageeqarnermullu Naalakkersuisoq Aqqaluaq B. Egede (IA) tusagassiuutinut nalunaaruteqarluni ilisimalikkat akuersaanngilluinnarlugit oqaaseqarpoq:
- Kinguaassiuutitigut atornerluinerit suugaluartulluunniit akuerisinnaanngilluinnarpakka. Najugaqartut namminneq angerlarsimaffimminni kinguaassiutitigut innarlerneqarnermik kannguttaatsuliorfigineqarnermillu nalaataqassasut soorunami akuerineqarsinnaanngilaq, angerlarsimaffitsimmi toqqissisimaffigisassaraat suliarlu pimoorulluinnarlugu tiguarput, Aqqaluaq B. Egede oqarpoq.
Suliassaqarfiit nutaat
Naalakkersuisut innarluutilinnut ulloq unnuarlu neqeroorutigineqartartuni pissutsit pineqartullu arlaannaannulluunniit attuumassuteqanngitsumik misissuiffigineqarnissaannik suliakkiisimapput, Ivaaqqami najugaqartoq siornaak pinngitsaalineqarluni arneriffigineqarsimanera paasinarsimmat.
Nalunaarusiami, Center for Folkesundhed i Grønland aamma Ilisimatusarfimmi Issittumi atugarissaarnermut centeri innarluutilinnut najugaqarfiit pillugit arlaannaannulluunniit attuumassuteqanngitsumik misissuisimanerat tunngavigalugu suliarineqartumi, ersersinneqarpoq nunatsinni ulloq unnuarlu neqeroorutini quliusuni najugaqarfinni qulingiluani kinguaassiuutitigut kannguttaatsuliorfigineqarsimasut imaluunniit pasitsaassisoqarsimanera ilisimaneqartoq.
- Tamatuma saniatigut nalunaarusiaq tunngavigalugu suliniutigineqarfigisassamik ataatsimik ilanngussisoqassaaq, suliniutigineqarfigisassami iliuusissatut pilersaarusiami takkuttussami Inuit Innarluutillit pillugit Naalagaaffiit Peqatigiit isumaqatigiissutaata malinneqarnissaanut iliuusissatut pilersaarut 2024-2034-mi kinguaassiutitigut atuisarnerit aamma kinguaassiutitigut atornerluisarnermik pinaveersaartitsinerit ukkatarineqassapput, Naalakkersuisoq tusagassiorfinnut nalunaaruteqarluni ilisimatitsivoq.
Atukkat soorlu ilaatigut kinguaassiutitigut kannguttaatsuliortarnernik innarliisarnernillu pinaveersaartitsinernut tunngassutillit nalunaarusiami takutinneqarlutillu inassuteqaasiorfigineqarput kiisalu inunnut innarluutilinnut ulloq unnuarlu najugaqarfissatut neqeroorutini maleruagassanik malittarisassanillu ilisimalersitsilluni. Taamaattumik Naalakkersuisoq assigiinngitsunik sulialinnik suleqatigiissitaliussaaq, suleqatigiissitap ulloq unnuarlu najugaqarfissatut neqerooruteqarfiup arlaannaanulluunniit attuumassuteqanngitsumik misissorneqarneranit inassuteqaatigineqartut misissussavaat.