siunissaq
Kirkegaard tunuarnialersaanngilaq: Naalakkersuisuuginnassaanga
Tusatsiakkat malillugit Jens-Erik Kirkegaardigooq Naalakkersuisuujunnaalerpoq. Tamannali eqqortuunngitsoq oqaatigaa
Inuussutissarsiornermut aatsitassarsiornermullu naalakkersuisoq Jens-Erik Kirkegaard Siumumeersoq naalakkersuisuujunnaalerpa?
- Naamik!
Tusatsiakkat malillugit naalakkersuisuunissani soqutigiunnaarsimavaa, tusatsiakkalli ilumoortortaqanngitsut oqaatigaa.
Inuttaata nammineerluni oqaatigaa.
- Tusatsiagarisimasatit aatsaat tusarpakka, taamaattumik oqaaseqarfigisinnaanngilakka, Siumumeersoq Jens-Erik Kirkegaard aperineqarami oqarpoq.
- Siumup politikkikkut oqaaseqartartuat Karl Kristian Kruse aggustip 26-ani ima allappoq aatsitassanik qaqutigoortunik piiaaniarnermi uran-mik akoqarsinnaanera qummut killilerneqarnissaa, tamanna illit politikki isumaqatiginngilat. Naalakkersuisuujunnaalerninnut tamanna toqqammaviua?
- Oqaatigeqqissavara: Tusatsiagarineqarsimasut suminngaannit aallartinnersut ilisimanngilara. Suliffigisara nuannaraara. Aatsitassarsiorneq arriippallaamik ingerlasoq isumaqaannarpunga.
- Tusatsiakkat ilagaat aqagu naalakkersuisuujunnaalersutit. Arfininngorpat aamma naalakkersuisuunissat neriorsuutigisinnaaviuk?
- Politikkimi neriorsuisoqarsinnaanngilaq susoqartussaaneranik. Taamaattumik neriorsuisinnaanngilanga. Suliara nuannaraara, inuussutissarsiornermut aatsitassarsiornermullu naalakkersuisoq Jens-Erik Kirkegaard oqarpoq.