Kiserliorneq saaffiginninnerillu pinartut Tusaanngami initupput
Tusaanngami naatsorsuutigineqarpoq saaffiginninnerit 30 procentimik amerleriassasut.
Tusaannga immikkut ittumik 900.000 koruuninik aningaasaliiffigissallugu politikerit novemberimi aalaajangerput.
Aningaasat pisariaqartinneqarluarput, oqarasuaammi siunnersuisarfik suli amerligaluttuinnartunit saaffigineqartarpoq.
Meeqqanut Inuusuttunullu Naalakkersuisoqarfiup naatsorsuutaani atuarneqarsinnaavoq kiserliorneq sulianullu pinartunut tunngatillugu saaffiginnittartut amerligaluttuinnarnerat Tusaanngami malugineqartoq.
Naalakkersuisoqarfk ilisimatitsivoq Tusaanngamut saaffiginnittut 2023-mi 5.000-t missarissagaat naatsorsuutigineqartoq, tassa siornamut sanilliullugu 30 procentimik amerlanerusut.
Ilisimaneqarnerulerneq
Naalakkersuisoqarfik naapertorlugu saaffiginnittartut amerlanerulernerannut pissutaavoq Tusaanngap saaffigineqarsinnaanera innuttaasunit ilisimaneqarneruleriartormat, aammalu Tusaanngap ammasarfii akunnialuinnaajunnaartillugit ulloq unnuarlu ammasussanngorlugu 10. februar 2023 aalajangerneqarsimammat.
- Tusaannga aamma nuna tamakkerlugu neqeroorutini ulloq unnuarlu kisimi ammasarpoq, Meeqqanut Inuusuttunullu Naalakkersuisoqarfik Sermitsiaq.AG-mut allagaqarluni akissuteqarpoq.
Naalakkersuisoqarfiup erseqqissarpaa pinartumik saaffiginnissutit ukioq manna amerleriarsimasut.
Saaffiginnissutit pinasuartumik qisuariarfigisariaqakkat
- Saaffiginnissutit taamaattut siunnersuisumit tiguneqaraangata, pinasuartumik kommunimut nalunaarutiginnittoqartariaqartarpoq, politiit attavigineqarlutik imaluunniit peqqinnissaqarfik attavigineqarluni, naalakkersuisoqarfik nassuiaavoq.
Saaffiginnissutit pinasuartumik qisuariarfigisariaqakkat 102-it 2022-mi nalunaarsorneqarsimapput. Tusaanngamut 9. november 2023-p tungaanut saaffiginnissutini pinasuartumik qisuariarfigisariaqakkat 140-lereersimapput.
Saaffiginnissutini taakkunani 140-ni, inuit 41-t imminut toqunnialersut siunnersuisunit oqaloqatigineqartariaqartarsimapput.
Allattorsimaffiit ataanni takuneqarsinnaapput saaffiginnissutit suunersut, tassanilu takuneqarsinnaavoq saaffiginnissutit 1.000-it sinneqartut kiserliorneq pissutigalugu saaffiginninnerusut.