Kisitsisit inuarnernut tunngasut qaffasissorujussuupput
Pinerluuteqarnerit paasiniarnerat politiinit ulapputigineqarput. Pinerlunniartartut amerlapput. Politiilli aamma pinerlunnerit immaqa ajornannginnerusumik paasisalerpaat, politiimmi sumi tamaani malinnaasinnaagamik.
![Politiit suliaqaleruttortut. Tamatumuuna nakuusertoqarneranut imaluunniit inuartoqarneranut attuumassuteqanngitsumik, ilungersunartumilli pisut allat patsisigalugit.](https://image.sermitsiaq.ag/395216.webp?imageId=395216&width=960&height=518&format=jpg)
Nunatta Politiivisa ukiumoortumik kisitsisitigut nalunaarsuutaani, sapaatip akunnerani matumani saqqummiunneqartussatut naatsorsuutigineqartumi, kisitsisit nikalluallannartut amerlapput. Taamaakkaluartorli aamma pitsaasutut taaneqarsinnaasunik ilaqarput.
Aviisi AG taama allappoq.
- Kisitsisini 2021-meersuni katersoqqammikkatsinni pinerlunniartartut ataatsimut isigalugit ikileriaateqalaarsimapput, politimester Bjørn Tegner Bay Folketingip Kalaallit Nunaannut ataatsimiititaliaanut taama paasissutissiivoq.
- Inunnut ulorianartumik pinerluuteqarnerit ajoraluartumik ajorluinnartumik inissisimapput. Taakkumi pinerluuteqarnernik nalunaarutigineqartartut affangajaannik amerlassuseqarput. Aamma politiit pinerluutigineqartartuni ajornerpaaq immikkut sammivaat – inuartoqartarnera.
- Ukiuni kingullerni sisamani-tallimani inuarnerit ukiumut agguaqatigiissillugit sisamat-tallimaasarput. Nunanut uatsinnut nallersuuttakkatsinnut naleqqiullugit amerlasoorujussuupput, Bjørn Tegner Bay ilisimatitsivoq, tamatumunngali atatillugu aamma pitsaasumik oqaasissaqarluni:
- Inuarnerit agguaqatigiissillugit amerlassusaat ukiut kingulliit 20-30-t ingerlaneranni ikileriarsimagaluarpummi. Ukioq mannali januaariuinnalersoq inuarnerit pingasut pereerput. Tamannali tunngavigalugu inerniliilluta oqaaseqarnissarput suli mianersuutigilaassavarput.
Paasineqartartut immaqa amerlanerusut
Nunatsinni pinerluuteqartarnerit Savalimmiunut sanilliullugit arfineq-pingasoriaammik amerlanerupput. Aamma nakuusernermik nalunaarutigineqartartut Danmarkimut sanilliullugit arfinileriaammik amerlanerupput. Tamannali ”naapertuilluartumik” sanilliussinertut taaneqarsinnaagunanngilaq, tassami Nunatsinni nalunaarutigineqartanngitsut nunanut allanut sanilliullugit immaqa ikinnerummata, inuiaqatigiinnimi amerlanngitsunik innuttalinni nakuusertarnerup isertuunniarnissaa ajornakusoornerusarmat.
Aviisimi AG-mi atuarnerusinnaavutit. Aviisi uani pissarsiariuk: