Kisitsisit kingulliit: Isertitat assigiinngissusaat 2021-mi annikilliallalaarsimapput
Naatsorsueqqissaartarfimmit isertitat assigiinngissusaat uuttuutit pingasut atorlugit naatsorsorneqarsimapput, uuttuutinilu pingasuni pineqartuni isertitat assigiinngissusaat 2021-mi annikilliallalaarsimasut takuneqarsinnaavoq.
Nunami maani isertitarineqartartut assigiinngissutaat Danmarkimut Nunanilu Avannarlerni nunanut allanut sanilliullugit suli annertungaatsiarput. Assigiinngissutaasulli siorna annikilliallassimasut, Naatsorsueqqissaartarfiup kisitsisaataasa kingulliit takutippaat.
Naatsorsueqqissaartarfimmit periutsit assigiinngitsut pingasut atorlugit isertitat assigiinngissutaasa uuttortarneqarsimanerat saqqummiunneqarput.
Uuttuut siulleq gini-koefficientimik taaneqartarpoq. Gini-koefficienti 0-imut qaninnerugaangami isertitat assigiinngisitaarneri annikinnerusarput.
2021-mi gini-koefficienti atorlugu uuttortaanerup takutissimavaa, isertitat assigiinngissusaat 2009-miilli aatsaat taamak appasitsigisoq, tamannalu takussutissami tulliuttumi takuneqarsinnaavoq:
Naatsorsueqqissaartarfimmit allapput, Gini-koefficientip pitsaaqutigigaa kisitsit ataaseq atorlugu isertitakinnerpaat isertitaqqortunerpaallu qanoq nikingatiginerannik takutitsisinnaanera.
Naatsorsueqqissaartarfimmit aamma piitsuussusermut qanissuseq naatsorneqarsimavoq. Piitsuussusermut qanittutut taaneqarsinnaasut tassaapput, inuiaqatigiinni amerlanerusut akissaqartitaannut akissaqanngitsut.
Inuit 9.538-t isertitakitsuusut
Piitsuussusermut qanittutut taaneqartut procentit assigiinngitsut atorlugit naatsorsorneqarsinnaapput:
- Innuttaasut affai appasinnerusunik isertitallit affaalu qaffasinnerusunik isertitallit isertitat nalingisa qeqqaniittoq annertussuseq atorlugu immikkoortinneqartarput.
- 2021-mi inuit 9.538-t 18 pct.-inik annertussusillit appasissunillu isertitallit isertitat nalingisa qeqqanni 60 procentit ataanni inissisimasutut. Isertitakinnerusut isertitat annertussusaasa qeqqanni 60 procentillu ataani inissisimasut tallimaagaangata ataaseq pitsuussusermut qanittumi inissisimasartoq tamanna isumaqarpoq.
Takussutissiami tulliuttumi takuneqarsinnaavoq, 60 procentimut killiliussaq misissuataaraanni, piitsuussusermut qanittutut taaneqartartut ikiliallalaarsimasut:
Uuttuutit pingajuat kingullerlu Naatsorsueqqissaartarfimmit atorneqartoq tassaavoq, isertitaqqortunerpaat isertitakinnerpaallu assigiinngissutaannik uuttortaat - S80/20.
- S80/20 atorlugu takuneqarsinnaavoq ilaqutariit isertitaasa assigiinngisitaarneranni isertitaqarnerpaat aamma isertitakinnerpaat nikingassutaat. Uuttuut nunat tamalaat akornanni isertitat nikingassutaannut nassuiaatitut atorneqarajuppoq, Naatsorsueqqissaartarfimmit allapput, nangillutillu:
- Isertitakitsut aamma isertitaqqortuut imminnut nikingassusaat Gini-koefficientimitulli ipput. 2021-mi Kalaallit Nunaanni S80/20 malillugu uuttuut 5,3-miippoq, takuuk titartagaq 6.3. Tamanna ilaqutariit qaffasinnerusumik isertitallit ilaqutariinnit isertitakinnerusunit 5,3-mik qaffasinnerusumik atoriaannarnik isertititaqarnerannik isumaqarpoq.
