Kisitsisit nutaat: Naligiinnginnerusoqalersimasoq
Naatsorsueqqissaartarfiup Kalaallit Nunaanni isertitat assigiinnginnerat naatsorsuinermini misissorsimavai, assiigiinngissutaallu ukiuni qulini kingullerni annertusariartuinnavissimapput, ilisimatooq naatsorsuisarnermilu pisortaasimasoq naliliivoq.
![Kisitsisit nutaat: Naligiinnginnerusoqalersimasoq](https://image.sermitsiaq.ag/177138.webp?imageId=177138&width=960&height=642&format=jpg)
Kalaallit Nunaanni naligiinngitsumik atugaqartoqarnera politikkikkut oqallittartnermi amerlasuutigut qitiutinneqartarsimavoq. Maannalu pineqartoq pillugu Naatsorsueqqissaartarfiup saqqummersitaa aqqutigalugu ilisimasaqarnerulertoqarsinnaavoq.
Naatsorsueqqissaartarfiup nunami iseritat assigiinngissusaat periutsit pingasut atorlugit naatsorsorsimavai:
Gini-koefficienti
Piitsuussusermut qanissuseq
S80/20
Ilisimatooq Naatsorsueqqissaartarfimmilu naatsorsuisarnermi pisortaasimasoq Birger Poppel naapertorlugu, ukiut qulit kingulliit ingerlasimanerat qimerluualaaraanni takuneqarsinnaavoq inuiaqatigiinni naligiinngissueq annertusiartorsimasoq:
- Taamatut ingerlanera allanngortarsimavoq. Assersuutigalugu naligiinngissuseq 2018-imiit 2019-imut annikilliallassimavoq. Naatsorsuinermili atorneqartut takutippaa, naligiinngissuseq annertusiartortoq, Biger Poppel Sermitsiaq.AG-mut oqarpoq.
Naligiinngissuseq siusinnerusukkut annikillisinneqarsimasoq
Taassuma isumaa naapertorlugu aamma kisitsisit takutippaat, Kalaallit Nunaat nunanut allanut sanillersuukkaanni annertoorujussuamik naligiinngiffiusoq. Birger Poppelili naapertorlugu, politikkerit siusinnerusukkut naligiinngissutsimik annikilliisimanerat qiviassallugu pingaaruteqarpoq.
Tamanna pisimavoq 2004-miit 2005-imut, taamannikkut inummut ilanngaat 40.000 koruuniniit 48.000 koruuninut qaffanneqarmat aamma nalinginnaasumik ilanngaat 8.000 koruuniniit 10.000 koruuninut qaffanneqarmat, akileraarummullu procenti akiliutigineqartartoq 2 procentimik qaffanneqarluni.
![Titartagartaliussami takutinneqarpoq, gini-koefficientip 2002-miit 2009-imut ineriartorsimanera. Gini-koefficienti annertunerutillugu naligiinnginneq annertunerusarpoq.](https://image.sermitsiaq.ag/745330.webp?imageId=745330&width=960&height=600&format=jpg)
- Allannguutit taakkua pissutaallutik isertitakinnerusartut akileraarnikinnerusalerput isertitaqarnerusartullu 2019-imi isertitat akileraarnerusalerlutik, tamakkiisumilli isigalugu akileraarutit nikippallaanngillat, Naatsorsueqqissaartarfik pisimasoq pillugu allappoq.
- Naligiinngissutaasut appartinniarlugit pissutsinik allannguisoqarmat, tamanna iluatsinneqarsimavoq, Birger Poppel oqarpoq, nangillunilu:
- Pissusitoqqalli uterfigineqaqqipallassimapput, naligiinngissuserlu taamanikkulli annetusiartuinnavissimalluni, taanna oqarpoq.