Kissaatiginngisamik meerartaarsinnaanngitsut ikiorserneqartalernissaat periarfissanngoqqinnissaa qanilliallattoq
Kissaatiginngisamik meerartaarsinnaanngitsut peqqinnissaqarfimmit akiulitsillutik ikiorserneqartalernissaat Inatsisartut isumaqatigiittut kissaatigaat. Aningaasaliissutit Inatsisartut ujarleqataaffigissagaat peqqissutsimut naalakkersuisup naqissuserpaa.
Nammineq kissaatiginngisamik meerartaarsinnaanngitsut Danmarkimi ikiorserneqarsinnaanerat peqqinnissaqarfimmit akilerneqartarnissaa Inatsisartuni partiit tamarmiusut taperserpaat. Siunnersuut sisamanngormat Inatsisartuni siullermeerlugu suliarineqarmat tamanna paasinarsivoq. Nammineq kissaatiginngisaminnik meerartaarsinnaanngitsut Qallunaat Nunaanni IVF aamma ICSI-mik ikiorserneqarsinnaanngorlugit Naalakkersuisut peqquneqarnissaannik Demokraatit siunnersuutaat Inatsisartut akerliusoqaratik akuersissutigimmassuk.
Akuersissutigineqarnera isumaqarpoq suliniutip aningaasaliiffiginissaanut Naalakkersuisut inatsisissatut siunnersuusiussasut.
Ukiumut 9 millionit koruuningajaat
- Peqqinnissaqarfiup missingersimavaa aappariit 40-t ukiut tamaasa reagensglas atorlugu suliaritittarnissanut innersuunneqarsinnaassasut. Naatsorsuinerni nutaani paasinarsisimavoq ukiumut Danmarkimi reagensglas atorlugu suliaritinnissanut neqeroortarneq 8.750.000 koruuninik akeqartassasoq, Anna Wangenheimip siunnersuutaani allaqqavoq.
Reagensglassi atorlugu Danmarkimi suliaritissinnaanermut neqeroorutaasup oqallisigineqarnera sivitsorpoq. Kissaatiginngisamik meerartaarsinnaanngitsut Danmarkimut ikkussiffigitikkiartorsinnaanerat akiliutsittarneq peqqinnissaqarfiup 2019-imi atorunnaarsippaa, taamanilu Naalakkersuisut aalajangernermut tapersiipput.
Aningaasat suminngaanniissappat
Reagensglassi atorlugu kissaatiginngisamik meerartaarsinnaanngitsunut aningaasartuutit aningaasanut inatsimmut isumaqatiginninniarnermi siusinnerusukkut isumaqatigiissutigineqartarput. Meerartaarsinnaanngitsut nammineq akiliissappata pissakinnerusut meerartaarnissamik takorluuinerat angujuminaassinnaasarmat.
- Taamaattumik aallaavittut innuttaasunut naligiimmik neqeroorutaasariaqartoq ataatsimiititaliaq isumaqarpoq, taamaattumik siunnersuutigineqartoq una neqeroorutaasoq matumunnga naapertuuttoq isumaqarfigalugu, Ilaqutariinnermut Peqqissutsimullu ataatsimiititaliap siunnersuummut isumaliutissiissutiminni allapput, akuerineqarnissaanullu innersuussillutik.
Inatsisartut piumasaqarnerat aallaavigalugu Naalakkersuisut Kalaallit Nunaata avataani ikiorserneqarsinnaanermut periarfissamik ammaassissappata, kissaatiginngisamik meerartaarsinnaanngitsut angalanertik, najugarnermut ikiorserneqarnerminnullu nammineq akilertarunnaassavaat. Tamanna aningaasanik naleqarmat aningaasaliissutissat Inatsisartut ujarleqataaffigissagaat Naalakkersuisut kissaatigaat.
- Siunnersuut akuerineqaqqullugu ataatsimiititaliap innersuukkaa Naalakkersuisut maluginiarpaat. Taamaammat aningaasanut inatsisissaq partiinut isumaqatiginninniutigineqalerpat Naalakkersuisut pineqartoq qaqissavaat, peqqissutsimut naalakkersuisoq Mimi Karlsen (IA) oqarpoq.
Nalunaarsorneqarlutik aappariit arnat namminneq kissaatiginngisamik meerartaarsinnaanngitsut suiaqatigiinnatik aappariinnut atugassarititaasut assigalugit periarfissaqalernissaat aamma naatsorsuutigineqarpoq.