Kissaatiginngisamik meerartaarsinnaanngitsut: Ikiuutissat Naalakkersuisunit unitsinneqarnerat Demokraatit iluarinngilaat
Kissaatiginngisamik meerartaarsinnaanngitsut ikiorsiinissamut aningaasaliisoqassasoq nalunaarutigeriarlugu, aningaasat allanut atortussanngortinneri nipagiunneqaannarnerat pissusissamisuunngilaq. Naalakkersuisut suliami isornartorsiorneqarnissaat kisimi naammanngilaq, Demokraatit siulittaasuat isumaqarpoq.
Kissaatiginngisamik meerartaarsinnaanngitsut Danmarkimukartinneqartarnissaannut aningaasaliissutit 8,7 milliuunit koruuniusunut tunngatillugu ikiorserneqarsinnaasut ukiuisa killigititarisassaat pillugu apeqqut, allatorluinnaq nipilimmik akineqarpoq.
Aningaasaliisoqarnissaa aningaasanut inatsisissamut 2024-moortumut siunnersuut saqqummiunneqarmat nalunaarutigineqaraluartoq, peqqinnissaq pillugu isumaqatigiissuteqarnermi aningaasat allamut atortussanngortinneqarsimapput. Aningaasat allamut atortussanngortinneri pillugit nalunaaruteqartoqarsimannginnera, Demokraatinit iluarineqanngilaq.
- Matumanilu nipaarsaaruteqqissaarlugu ingerlannissaa aaliangersimallunikku. Ataatsimilluunniit oqaasertalernaveersaarsimavaat. Immaqaana nammineq pisuussutiginngisaminnik meerartaarsinnaanngitsut malinnaanngissoralugit avaqqutaareriaraluartut, Demokraatit siulittaasuat, Jens-Frederik Nielsen tusagassiorfinnut nalunaaruteqarluni apeqqusiivoq.
Inatsisartunut ataqqinninnginneruvoq
Jens-Frederik Nielsen isumaqarpoq kissaatiginngisamik meerartaarsinnaanngitsunut ikiuutissanut aningaasaliinerit allamut atortussanngortinneqarnerini, Inatsisartut sulinerannik ataqqinninnginnermik takutitsinerusoq.
- Naalakkersuisuniit akisussaaffimmiik qimarratiginninnertut annertuutut isigaarput. Taamatuttaarlu aamma Inatsisartunit aaliangersaasimaneranniit ajorluinnartumik qimarratiginninneruvoq. Naalakkersuisut paasisariaqarpaat tamat oqartussaaqataanerat malinniaraanni taava aamma Inatsisartuni aaliangersaanerit malinneqarnissaat pisussaaffiummat.
- Demokraatiniit tamat oqartussaaqataanerat aammalu tamanna malillugu aaliangersaasoqartarnissaa pingaartittorujussuuarput, taamaattumik ajorluinnartutut isigaarput Naalakkersuisut Inatsisartunut taama ataqqinninngitsigisinnaanerat, Inatsisartut tamakkiisoq aaliangiinermi isumaqatigiittoq avaqquteriarlugu kinguneratigut kukkullutik toqqorteriaraluarlugu, Jens-Frederik Nielsen oqarpoq.
Aningaasanut naalakkersuisuusimasoq, Naaja Nathanielsen aningaasanut inatsisissamut siunnersuutip saqqummiunnerani erseqqissaasimavoq siunnersuutip akuerineqarnissaata tungaanut allannguuteqartoqartarsinnaasoq.
Tunuaqqusisoq
IVF-imik aamma ICSI-mik Danmarkimi nakorsartittarneq december 2018-imi neqeroorutaajunnaarsinneqarpoq. Kissaatiginngisamik meerartaarsinnaanngitsut nakorsartinnissaannut ikiorsiinissaq politikkikkut taamanili sulissutigineqalerpoq. Siunnersuut Inatsisartuni ukiakkut ataatsimiinnermi akuersissutigineqaraluarpoq, aningaasat ukiumut 8,7 milliuunit koruunit atortussanngortinneqarlutik.
Demokraatinit iluarineqanngilaq akisussaaffimmik tigusiumasoqannginnera, partiilu isumaqarpoq akisussaaffik Naalakkersuisut iluannit tiguneqartariaqartoq:
- Inissisimaffik uani Aningaasaqarnermut Naalakkersuisoq aammalu Peqqinnissamut Naalakkersuisoq ajorluinnartumik akisussaaffimminnik qimarratiginnissimapput - nammineq pisuussutiginngisaminnik meerartaarsinnaanngitsunut aammalu Inatsisartunut. Taamaattumik Demokraatiniit sakkortuumik kaammattuutigissavarput iliuuserisimasaminnut akisussaaffimmik tigusillutik atuuffimminiik tunuarnissaminnut nalunaarutertik sukkanerpaamik tunniutissagaat, Demokraatit siulittaasuat allappoq.