KNAPK-mi immikkoortortaqarfiup Tanbreezip aatsitassarsiornissaa akerleraa
Killavaat Alannguanni aatsitassarsiortoqarnissaa Narsami aalisartunit ernumagineqarpoq. Aatsitassarsiorfissap eqqaani aalisagarpassuit pisarineqartarput, taakku annaaneqarnissaa ernumassutigineqarpoq
KNAPK-p Narsami immikkortortaqarfiani ilaasortat tamarmik Tanbreezip Killavaat Alannguanni aatsitassarsiornissaat akerleraat.
Immikkoortortaqarfiup siulittaasuata tulliata Kasper Motzfeldtip Sermitsiaq.AG-mut tamanna oqaatigaa.
- Tanbreezip aatsitassarsiorniarnera eqqartortualernikuuarput. Killavaat Alannguisa eqqaanni kangerluarsummi umiarsualiviornissap eqqaani ukioq kaajallallugu aalisarfigisarparput. Saarullittarineqartartut 70 procent missaa tassanngaanniit pisarisarparput. Piiaasoqalissappat ajortorujussuarmik kinguneqassaaq, aalisaqqusaagunnaassaagut immaqalu mingutitsisoqassalluni, Kasper Motzfeldt oqarpoq.
Annaasaqaataassaaq
Umiarsualivik allamut nuunneqassappat Qaqortumi aalisartut eqqorneqassasut taakkartorpaa.
- Taamaattumik aatsitassarsiorneq aallartippat aalisarfipput annaassavarput, pisarisartakkagut annaassavagut. Taamaattumik aatsitassarsiornissap unitsinneqarnissaa soorunami neriuutigaarput, Kasper Motzfeldt oqarpoq.
Aatsitassarsioqatigiiffiup Tanbreezip Kujataani Killavaat Alannguanni piiaanissamut qinnuteqaataa Naalakkersuisut akuersissutigaat, sumiiffik akuersissuteqarfiusoq 18 kvadratmeterinik annertussuseqarpoq.